ហេតុការណ៍ដ៏រន្ធត់នេះកើតឡើងនៅថ្ងៃទី១៧ ខែធ្នូ ឆ្នាំ២០២១ វេលាម៉ោង២១នឹង ១០នាទី ចំណុចវត្តភ្នំស្លឹក ស្ថិតក្នុងភូមិបឹងអំពិល ឃុំស្ដៅ ស្រុករតនមណ្ឌល ខេត្តបាត់ដំបង ។
លោកវរសេនីយ៍ឯក សន និល អធិការនគរបាលស្រុកររនមណ្ឌល បានអោយដឹងថា ជនល្មើសប្រព្រឹត្តិអំពើហិង្សាខាងលើឈ្មោះ ណាត មករា ភេទប្រុស អាយុ២៥ឆ្នាំ រស់នៅចំណុចកើតហេតុខាងលើ បានធ្វើសកម្មភាពយកដែកប្រវែង ១ម៉ែត្រ វាយទៅលើម្ដាយចុងរបស់ខ្លួនឈ្មោះ សុខ យីម អាយុ៥៨ឆ្នាំ បណ្ដាលអោយបាក់ដៃខាងស្ដាំ របួសខ្នងជើងខាងស្ដាំ និងបែកក្បាលផ្នែកខាងស្ដាំ (រងរបួសធ្ងន់បញ្ជូនទៅមន្ទីរពេទ្យខេត្ត)។
ក្រោយធ្វើសកម្មភាពរួច ជនសង្ស័យបានដុតបំផ្លិចបំផ្លាញលំនៅឋានរបស់ខ្លួនមានទំហំ ៣ម៉ែត្រ x ៤ម៉ែត្រ (ធ្វើអំពីឈើប្រក់ស័ង្កសីជញ្ជាំងស័ង្កសី) ព្រមទាំងឆេះម៉ូតូចាស់ចំនួន ០២គ្រឿង ខូចខាតទាំងស្រុង ។
ករណីនេះ សមត្ថកិច្ចបានឃាត់ខ្លួនជនសង្ស័យយកមកកាន់អធិការដ្ឋាននគរបាលស្រុករតនមណ្ឌល និងរៀបចំសំណុំរឿង ដើម្បីបញ្ជូនទៅការិយាល័យជំនាញខេត្ត ដើម្បីអនុវត្តបន្តតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
មតិយោបល់