រដ្ឋមន្ត្រីការបរទេសអ៊ុយក្រែន Dmitry Kuleba បាននិយាយកាលពីថ្ងៃអាទិត្យ មុនការចរចាររវាងទីក្រុងមូស្គូ និងទីក្រុងគៀវថា អ៊ុយក្រែននឹងមិន “ចុះចាញ់” ប្រទេសរុស្ស៊ីនោះទេក្នុងកាលៈទេសៈណាក៏ដោយ ។

Kuleba បាននិយាយនៅក្នុងសន្និសីទកាសែតក្នុងទីក្រុងគៀវថា “មិនមានអ្វីអាក្រក់នៅក្នុងកិច្ចពិភាក្សាបែបនេះឡើយ ហើយប្រសិនបើលទ្ធផលនៃកិច្ចពិភាក្សាទាំងនេះនឹងមានសន្តិភាព និងការបញ្ចប់សង្រ្គាមនោះ គួរតែត្រូវបានស្វាគមន៍” ។

លោកសង្កត់ធ្ងន់ថា “ប៉ុន្តែ​ខ្ញុំ​ចង់​បញ្ជាក់​ឲ្យ​ច្បាស់​ថា យើង​នឹង​មិន​ចុះចាញ់ យើង​នឹង​មិន​ចុះញម យើង​នឹង​មិន​បោះបង់​ទឹកដី​របស់​យើង​សូម្បីប៉ុនក្រចកដៃ” ។

លោកបាននិយាយថា “អ៊ុយក្រែនបានយល់ព្រមបញ្ជូនគណៈប្រតិភូទៅព្រំដែនដើម្បីស្តាប់អ្វីដែលរុស្ស៊ីចង់និយាយ និងដើម្បីគូសបញ្ជាក់អំពីអ្វីដែលទីក្រុងគៀវគិតអំពីសង្រ្គាមនេះ និងសកម្មភាពរបស់រុស្ស៊ីជាដើម” ។

គួរបញ្ជាក់ថា គណៈប្រតិភូ​ទាំងពីរ​គ្រោង​នឹង​ជួបពិភាក្សា​គ្នា​នៅ​ទីតាំង​ដែល​មិន​បញ្ចេញ​ឈ្មោះ​ក្នុង​ប្រទេស​បេឡារុសជិត​ព្រំដែន​ប្រទេស​ទាំងពីរនាថ្ងៃចន្ទនេះ ៕