(វ៉ាស៊ីនតោន)៖ សហរដ្ឋអាមេរិកជឿជាក់ថារុស្ស៉ី កំពុងពង្រឹង និងប្រមូលផ្ដុំកម្លាំងទ័ពរបស់ខ្លួនឡើងវិញ នៅក្នុងតំបន់ដុនបាស់ (Donbas) ស្ថិតនៅភាគខាងកើតប្រទេសអ៊ុយក្រែន ជាទីដែលមន្ត្រីអ៊ុយក្រែននិយាយថាកងទ័ពរុស្ស៉ីត្រៀមបើកការវាយលុកជាថ្មីឆាប់ៗនេះ។

នៅក្នុងសន្និសីទសារព័ត៌មាននៅថ្ងៃចន្ទសប្ដាហ៍នេះ (ម៉ោងនៅវ៉ាស៊ីនតោន) អ្នកនាំពាក្យមន្ទីរបញ្ចកោណ លោក ចន ឃឺប៊ី (John Kirby) ក៏បានឱ្យដឹងដែរថាក្បួនរថពាសដែករុស្ស៉ីត្រូវបានប្រទះឃើញកំពុងធ្វើដំណើរឆ្ពោះទៅកាន់ទីក្រុង អ៉ីហ្ស៉ីយូម (Izyum) ដែលស្ថិតនៅចម្ងាយ ១៨០គីឡូម៉ែត្រពីខាងជើងទីក្រុង ដូណេត (Donetsk)។ តែភ្លាមៗ គេមិនទាន់ដឹងច្បាស់ថាតើមានរថពាសដែកគ្រឿង ឬកងទ័ពប៉ុន្មាននាក់ នៅក្នុងក្បួនខាងលើនោះទេ។

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ក៏បានព្រមានដែរថារុស្ស៉ីអាចនឹងបើកការវាយប្រហារលើទីក្រុងកៀវសាជាថ្មី ប្រសិនបើតំបន់ដុនបាស់ធ្លាក់ក្នុងចូលក្នុងដៃកងទ័ពរុស្ស៉ី៕

ប្រភព៖ Al jazeera