ព័ត៌មានជាតិ

លោក អេង ជាសាន ដឹកនាំកម្លាំងសមត្ថកិច្ច ចុះបង្ក្រាបបទល្មើសនេសាទចំនួន២ខេត្ត

កំពង់ឆ្នាំង: ប្រធានរដ្ឋបាលជលផល បានដឹកនាំកម្លាំងសមត្ថកិច្ចជលផលថ្នាក់កណ្តាល កម្លាំងអធិការដ្ឋានខាងត្បូងបឹងទន្លេសាប និងកម្លាំងខណ្ឌ​រដ្ឋបាលជលផលកំពង់ឆ្នាំង ចុះពិនិត្យ បទល្មើសនេសាទនៅចំណុចព្រំប្រទល់ខេត្តកំពង់ឆ្នាំង និងខេត្តពោធិ៍សាត់ និងបានបង្ក្រាបបទល្មើសនេសាទមានរបាំងសាច់អួន និងរបាំងស្បៃមុងបានមួយចំនួនធំផងដែរ។

លោក អេង ជាសាន ប្រតិភូរាជរដ្ឋាភិបាល និងជាប្រធានរដ្ឋបាលជលផល កាលពីរសៀលថ្ងៃទី០៧ ខែកញ្ញា ឆ្នាំ២០១៦ ម្សិលម៉ិញនេះ បានចុះពិនិត្យមើល​បទល្មើស​នេសាទនៅចំណុចព្រំប្រទល់ខេត្តកំពង់ឆ្នាំង និងខេត្តពោធិ៍សាត់ ថាតើនៅក្នុងរដូវបិទនេសាទនេះ បទល្មើសនេសាទមានការកើតឡើង ឬអត់?។ នៅពេលចុះ ទៅដល់ចំណុច​ព្រំប្រទល់នៃខេត្តទាំង២ គេឃើញទឹកដីខេត្តកំពង់ឆ្នាំង មានដាក់របាំងសាច់អួន៣ខ្សែ នៅចំណុចភូមិក្រចាប់ ឃុំឆ្នុកទ្រូ ដោយឡែកខាងទឹកដីខេត្តពោធិ៍សាត់វិញ ចាប់ពីចំ​ណុច​​ភូមិក្រចាប់ ចំណុចចម្ការតាហោ ក្នុងភូមិក្បាលត្រាច រហូតដល់ភូមិផ្គោល ឃុំចំបក់អន្សា ស្រុកក្រគរវិញ គឺមានបទល្មើសរបាំងស្បៃមុង កើតមានច្រើនដែលដាក់លាក់​នៅក្នុងព្រៃរនាម និងខ្លះទៀត បានដាក់នៅកណ្តាលវាលតែម្តង។

ក្នុងពេលចុះពិនិត្យ ឃើញសភាពបែបនេះ លោក អេង ជាសាន បានបញ្ជាកម្លាំងឲ្យចុះរុះរើ និងកម្ទេចនៅក្នុងទឹកដីឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង រុះរើបាន​របាំងសាច់អួនចំនួន៣កន្លែង ប្រវែង៣០០ម៉ែត្រ បង្គោល១៥០ដើម រឹបអូសលបលូ៦មាត់ និងបានចាក់លែងត្រីចូលបឹងធម្មជាតិវិញ បានចំនួន២០គីឡូក្រាម។

ដោយឡែកនៅក្នុងទឹកដីឃុំអន្សា ចំបក់ ស្រុកក្រគរ ខេត្តពោធិ៍សាត់វិញ បង្ក្រាបបានរបាំងស្បៃមុង១៥កន្លែង ប្រវែង៧៥០ម៉ែត្រ បង្គោល៤៥០ដើម លបលូស្បៃមុង៣០មាត់ និងបានចាក់លែងកូនត្រីគ្រប់ប្រភេទចូលទន្លេធម្មជាតិវិញចំនួន២០០គីឡូក្រាម។

ប្រធានរដ្ឋបាលជលផល អេង ជាសាន បានបញ្ជាក់ថា នៅថ្ងៃទី០៨ ខែកញ្ញា ឆ្នាំ២០១៦នេះ លោកនឹងបញ្ជាកម្លាំងរដ្ឋបាល ជលផលថ្នាក់កណ្តាល កម្លាំងអធិការដ្ឋាន​ខាងត្បូង និងខាងជើងបឹងទន្លេសាប រួមសហការជាមួយកម្លាំងខណ្ឌរដ្ឋបាលជលផលកំពង់ឆ្នាំង និងពោធិ៍សាត់ ឲ្យចុះបង្ក្រាប និងរុះរើរបាំងស្បៃមុងឲ្យអស់ពី​ក្នុងទឹក​ដី​ស្រុកក្រគរ ខេត្តពោធិ៍សាត់ ជាបន្តទៀត ព្រោះរបាំងស្បៃមុងនេះ ជាបទល្មើសនេសាទមួយប្រភេទដែលបានបំផ្លាញពូជមច្ឆាជាតិគ្រប់ប្រភេទ។

លោក ក៏បានសំណូមពរដល់អាជ្ញាធរមូលដ្ឋាន កងកម្លាំងទាំង៣ប្រភេទ សហគមន៍ នេសាទ និងប្រជាពលរដ្ឋ សូមចូលរួមសហការទប់ស្កាត់ រាយការណ៍ និងបង្ក្រាបបទ​នេសាទនៅក្នុងមូលដ្ឋានរបស់ខ្លួនឲ្យមានប្រសិទ្ធភាព ជាមួយកម្លាំងរដ្ឋបាលជលផល ដើម្បីរក្សាបាននូវពូជត្រីឲ្យបានគង់វង្ស៕

នេសាទ

នេសាទ

នេសាទ

នេសាទ

នេសាទ

នេសាទ

នេសាទ

មតិយោបល់