កំពង់ធំ: ផ្លូវលំ២ខ្សែឆ្ពោះទៅកាន់វត្តដួងសុរិយា និងទៅកាន់មណ្ឌលសុខភាពឃុំក្ដីដូង ស្រុកកំពង់ស្វាយ ខេត្តកំពង់ធំ ត្រូវប្រជាពលរដ្ឋ​នៅមូល​ដ្ឋាននោះ រួបរួមគ្នាជួសជុល និងកសាងឡើងវិញ ខណ:ដែលកំណាត់ផ្លូវ២ខ្សែនេះ ទទួលរងការខូចខាតយ៉ាងធ្ងន់ធ្ងរនោះ។

ក្នុងការជួសជុល និងស្ថាបនាផ្លូវនេះ ប្រជាពលរដ្ឋបានប្រើដោយកម្លាំង និងមធ្យោបាយ ផ្ទាល់ខ្លួនមាន ដូចជា បង្គី ចប រទេះគោ ក្របី គោយន្ត និងត្រាក់ទ័រ ជាដើម ដើម្បីកាប់និង ដឹកជញ្ជូនដី យ៉ាងសស្រាក់សស្រាំ ក្រោមការដឹកនាំ របស់លោក ជា វ៉ាន់ចាន់ សមាជិកក្រុម ប្រឹក្សាខេត្ត និងព្រះចៅវត្ត ដួងសុរិយា គឺព្រះតេជគុណ ជ សុចាយ។

លោក ជា វ៉ាន់ចាន់ បានមានប្រសាសន៍ថា សកម្មភាពនេះ គឺចលនាប្រជាជន ដើម្បី ប្រជាជន ហើយ ដូនតាយើង កាលពីអតីតកាល ក៏ធ្វើដូច្នេះដែរ គឺដឹកនាំ ប្រជាជន ពុទ្ធបរិស័ទ ព្រះសង្ឃកសាង សមិទ្ធផលនានា ជាច្រើន នៅក្នុងមូលដ្ឋាន ដោយមិនពឹងលើជំនួយ ឬលុយកាក់ជួលនោះ ទេ ហើយសមិទ្ធិទាំងនោះ បានធ្វើប្រជាពលរដ្ឋ​ដឹងថា ជាទ្រព្យសម្បត្តិរបស់ពួកគាត់ និងចូលរួម ទទួល ខុសត្រូវទាំងអស់គ្នា មិនតែប៉ុណ្ណោះ បានធ្វើឲ្យពួកគាត់បង្កើនការសាមគ្គីគ្នា បានយ៉ាងល្អ ប្រសើរ ទៀត​ផង។

ព្រះចៅអធិការ ព្រះតេជគុណ ជ សុចាយ បានមានសង្ឃដីការថា ផ្លូវ២ខ្សែនេះ ប្រវែង៨០០ ម៉ែត្រ និង១ខ្សែទៀតប្រវែង១១៥០ម៉ែត្រ ឆ្ពោះទៅកាន់វត្តដួងសុរិយា និងមណ្ឌ​ល​សុភាព ឃុំក្ដីដូង ហើយតភ្ជាប់ទៅកាន់បណ្ដាភូមិផ្សេងទៀត និងទីប្រជុំជនក្រុងស្ទឹងសែនទៀតផង។

គួរបញ្ជាក់ថា រយ:ពេល២ថ្ងៃ គឺថ្ងៃទី១១ និង១២ ក្រោមការកេណ្ឌគ្នាយ៉ាងច្រើនកុះករនិង ធ្វើយ៉ាងសកម្មទាំងទឹកមុខរីករាយ របស់ប្រជាពលរដ្ឋ នៅឃុំក្ដីដូង បានធ្វើឲ្យផ្លូវ២ខ្សែនេះ ធ្វើរួច ជាស្ថាពរនិងក្លាយជាចំណងដៃ យ៉ាងសុខស្រួល ក្នុងធ្វើដំណើរ ជាពិសេសនៅរដូវបុណ្យបិណ្ឌ ភ្ជុំខាងមុខ ៕