សៀមរាប: រូបចម្លាក់កូនប្រាង្គប្រាសាទចម្លងរាងសាជី ធ្វើពីថ្មភក់ចំនួន២ដុំ ត្រូវបានសមត្ថកិច្ច រដ្ឋបាលព្រៃ​ឈើស្រុកបន្ទាយស្រី ចុះបង្ក្រាបបទល្មើសព្រៃឈើ បានប្រទះឃើញ យកមកប្រគល់ទៅឲ្យអាជ្ញាធរថែរក្សា និងរៀបចំឯកសារ​បញ្ជូនទៅកាន់អាជ្ញាធរអប្សរាចាត់ការបន្ត។ ដែលការចុះបង្ក្រាបបទល្មើសព្រៃឈើនេះ ធ្វើឡើង កាលពីយប់ថ្ងៃទី២០ ខែកញ្ញា ឆ្នាំ២០១៦ ស្ថិតនៅចំណុចភូមិត្បែងលិច ឃុំត្បែង ស្រុកបន្ទាយស្រី ខេត្តសៀមរាប ។

លោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរា បានឲ្យដឹងថា តាមការសន្និដ្ឋាន បានឲ្យដឹងថា ចម្លាក់​នេះ អាចស្ថិតនៅក្នុងសតវត្សទី១០ តែអ្នកជំនាញមិនទាន់អាចកំណត់អត្តសញ្ញាណបានថា ចម្លាក់នេះ ត្រូវជនល្មើសនាំចេញពីតំបន់​ណានៅឡើយនោះទេ ។ អ្នកជំនាញនឹងសិក្សាលម្អិតអំពីចម្លាក់នេះនៅពេលក្រោយ នៅពេលដែលនីតិវិធីបានបញ្ចប់ជាស្ថាពរ ។

លោកបន្តថា បន្ទាប់ពីទទួលបានការជូនដំណឹងពីរដ្ឋបាលព្រៃឈើប្រចាំស្រុកបន្ទាយស្រីនៅរសៀលថ្ងៃទី២១ ខែកញ្ញា ឆ្នាំ២០១៦ អ្នកជំនាញនៃអាជ្ញាធរជាតិអប្សរា រួមជាមួយនឹងនគរបាលការពារបេតិកភណ្ឌ បានចុះទៅពិនិត្យដល់ទីស្នាក់ការរដ្ឋបាល​ព្រៃឈើស្រុក​បន្ទាយស្រី ដោយធ្វើកំណត់ហេតុច្បាស់លាស់ និងបញ្ជូនវត្ថុតាងទាំងអស់ រួមទាំងចម្លាក់ថ្មបុរាណ២ដុំទៅរក្សាទុកបណ្តោះ​អាសន្ននៅ​អធិការដ្ឋាននគរបាលស្រុកបន្ទាយស្រី ដើម្បីថែរក្សានិងរៀបចំបន្ត ទៅឲ្យអាជ្ញាធរជាតិអប្សរាចាត់ការបន្តទៅតាមផ្លូវច្បាប់។ ហើយ​បើតាមការសន្និដ្ឋានជំហានដំបូង បានឲ្យដឹងថា ក្រុមជនល្មើសនោះអាចលួចគាស់ពីតំបន់ប្រាសាទនានាក្នុងខេត្តសៀមរាប ដូចជា​ស្រុកបន្ទាយស្រី ប្រាសាទស្វាយលើ និងស្រុកជីក្រែងជាដើម ៕