កណ្តាល: កម្លាំងនគរបាលស្រុកកោះធំ សហការជាមួយកម្លាំងនគរបាលប្រឆាំងបទល្មើសសេដ្ឋកិច្ចនៃស្នងការនគរបាលខេត្តកណ្តាល នៅព្រឹកថ្ងៃទី២៣ ខែកញ្ញា ឆ្នាំ២០១៦នេះ បានបើកប្រតិបត្តិការទ្រង់ទ្រាយធំ ចុះទៅបង្ក្រាបបទល្មើសនេសាទ នៅលើផ្ទៃទឹក ស្ថិតនៅឃុំព្រែកជ្រៃ ដោយឃាត់ខ្លួនដែលជនជាតិវៀតណាមចំនួន៤នាក់ និងរឹបអូសបានឧបករណ៍នេសាទដោយខុសច្បាប់ជាច្រើន ប៉ុន្តែខណ:កម្លាំងសមត្ថកិច្ចកំពុងអនុវត្តវិធានការណ៍លុបបំបាត់បទល្មើសក៏ស្រាប់បែកធ្លាយមានអ្នកខឹងសម្បារថានគរបាលលូកដៃមកបង្ក្រាបបទល្មើសជលផលដែលជាដែនសមត្ថកិច្ចរដ្ឋបាលជលផល។
តែយ៉ាងណាលោក លឹម សុគន្ថាព្រះរាជអាជ្ញាសាលាដំបូងខេត្តកណ្តាល បានបញ្ជាក់ថាប្រតិបត្តិការបង្ក្រាបបទល្មើសនេសាទនៅស្រុក កោះធំរបស់សមត្ថកិច្ច នគរបាលស្រុកកោះធំមានបញ្ជាពីលោកអភិបាលខេត្ត និងរូបលោក(ព្រះរាជអាជ្ញា)បន្ទាប់ពីមានសេចក្តីរាយការណ៍មានបទល្មើសនេសាទកើតឡើងច្រើនហើយជំនាញជលផលក៏ត្រូវសហការ។
សូមបញ្ជាក់ថាប្រតិបត្តិការនេះ បានធ្វើឡើងក្រោមការដឹកនាំបញ្ជាផ្ទាល់ពីលោកឧត្តមសេនីយ៍ត្រី ឈឿន សុចិត្ត ស្នងការរងនគរបាលខេត្តនិងជាប្រធានការិយាល័យកណ្តាលប្រឆាំងបទល្មើសក្រោមការណែនាំពីលោកឧត្តមសេនីយ៍ទោ អ៊ាវ ចម្រើន ស្នងការនគរបាលខេត្តនិងកាបញ្ជាដ៏ម៉ឺងម៉ាត់របស់លោកអភិបាលខេត្តកណ្តាលដោយមានការសម្របសម្រួលពីព្រះរាជអាជ្ញាសាលាដំបូងខេត្តកណ្តាល។
អធិការនគរបាលស្រុកកោះធំ លោកវរសេនីយ៍ឈឿន ប៊ុនឆន បានបញ្ជាក់ថា ឧបករណ៍នេសាទខុសច្បាប់យ៉ាងច្រើន ដែលភាគច្រើនលបនិងព្រួល ត្រូវបានកម្លាំងរបស់លោក សហការជាមួយកម្លាំងជំនាញនគរបាលខេត្តរកឃើញ ហើយធ្វើការដកហូតតែម្តង ដែលត្រូវក្រុមឈ្មួញ ភាគច្រើនជាជនជាតិវៀតណាម បានដាក់ពង្រាយដើម្បីចាប់ត្រី។
បើតាមលោក ឈឿន ប៊ុនឆន សម្រាប់ប្រតិបត្តិការនេះ កម្លាំងសមត្ថកិច្ច បានធ្វើការឃាត់ខ្លួន ជនជាតិវៀតណាម ជិត១០នាក់ផងដែរ ដើម្បីបន្តការសួរនាំ ពីសកម្មភាពដាក់ឧបករណ៍នេសាទខុសច្បាប់ទាំងនេះ។
មន្រ្តីនគរបាលម្នាក់ ដែលចូលរួមប្រតិបត្តិការនេះ បានលួចបង្ហើបថា នៅពេលចុះបង្ក្រាបស្រាប់តែខាងក្រុមមន្រ្តីជលផល ខឹងយ៉ាងខ្លាំងថា រំលោភដែនសមត្ថកិច្ចរបស់ខ្លួន រហូតមានការរាយការណ៍ទៅកាន់លោកអភិបាលខេត្ត និងព្រះរាជអាជ្ញាទៀតផង តែត្រូវបានស្តីបន្ទោសត្រឡប់មកវិញ ពីព្រោះនេះជាបទល្មើសជាក់ស្តែង ហើយមន្រ្តីនគរបាល ក៏ជាមន្រ្តីនគរបាលយុត្តិធម៌ផងដែរ ដូច្នេះគឺអាចបង្ក្រាបបាន៕
//youtu.be/lnlGBTj1k0U
មតិយោបល់