ភ្នំពេញ: យុវជនម្នាក់ត្រូវបានកម្លាំងនរគបាលនៃអធិការដ្ឋាននរគបាលខណ្ឌទួលគោក ធ្វើការឃាត់ខ្លួនជាក់ស្តែងរួមជាមួយម៉ូតូនិង​វត្ថុតាង​ប្រព្រឹត្តបទល្មើសកាច់សោរករម៉ូតូ ។ ការចាប់ខ្លួននេះបានធ្វើឡើងកាលពីវេលាម៉ោង១០ និង៣០នាទី ថ្ងៃទី២៦ខែកញ្ញា ឆ្នាំ២០១៦ ស្ថិតនៅតាម​បណ្តោយផ្លូវមុនីរ៉េត ក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ ។

សមត្ថកិច្ចបានឲ្យដឹងថា ជនសង្ស័យដែលសមត្ថកិច្ចចាប់ខ្លួនខាងលើនេះមានឈ្មោះ កែវ សុធា ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅ​ម្តុំ​សង្កាត់អូរឫស្សី១ ខណ្ឌ៧មករា រាជធានីភ្នំពេញ ។

សមត្ថកិច្ចបានបន្តឲ្យដឹងថា មុននឹងឈានដល់ការចាប់ខ្លួនបានជនសង្ស័យខាងលើ សមត្ថកិច្ចបានដាក់គោលដៅត្រួតពិនិត្យនិង​អនុវត្តច្បាប់ចរាចរណ៍ នៅផ្លូវមុនីរ៉េត ដែលដឹកនាំដោយលោក តី សុវណ្ណារ៉េត អធិការរងនៃអធិការដ្ឋាននរគបាលខណ្ឌទួលគោក ខណ:នោះក៏ប្រទះឃើញជនសង្ស័យមានការ​សង្ស័យ ទើបសមត្ថកិច្ចឃាត់ឲ្យឈប់ដើម្បីធ្វើការឆែកឆេរ ក៏រកឃើញវត្តុតាងប្រព្រឹត្តបទល្មើសនៅក្នុងហោប៉ាវអាវរបស់ជនសង្ស័យ បូករួមទាំងម៉ូតូគ្មាន​ស្លាក​លេខមួកកញ្ចក់ ទើបធ្វើការឃាត់ខ្លួនប្រគល់ជូនមន្ត្រីជំនាញធ្វើការសាកសួរតែម្តង ។

យោងតាមការសារភាពរបស់ជនសង្ស័យបានឲ្យដឹងថា ខ្លួនបានខ្ចីម៉ូតូ ម៉ាកMSX ពណ៌ស គ្មានស្លាកលេខ កញ្ចក់ រួមទាំងគ្មានមួកសុវត្ថិភាព ជិះពីកើត​ទៅលិច ដោយចេញពីម្តុំផ្សារធំថ្មីទៅវត្តស្ទឹងមានជ័យ ក្នុងបំណងទៅទិញទឹកក្រឡុកនិងពងទាកូន លុះបានមកដល់ចំណុចត្រួតពិនត្យ និងអនុវត្តច្បាប់​ចរាចរណ៍ ត្រូវបានកម្លាំងឆែកឆេរឃើញវត្ថុតាងសម្រាប់កាច់សោរម៉ូតូ នៅក្នុងហោប៉ាវអាវ និងបានឃាត់ខ្លួនភ្លាមៗតែម្តង ។

បច្ចុប្បន្នជនសង្ស័យរួមទាំងវត្ថុតាងត្រូវបានកម្លាំងនរគបាល ឃុំខ្លួនបណ្តោះអាសន្ននៅអធិការដ្ឋាននរគបាលខណ្ឌទួលគោក ដើម្បីសាកសួរនិងកសាង​សំណុំ​រឿងបញ្ជូនខ្លួនទៅកាន់តុលាការ ចាត់ការតាមនីតិវិធី៕