ភ្នំពេញ: នារីវ័យក្មេងម្នាក់ជំនាញខាងបន្លំលួចយកម៉ូតូនិងទូរស័ព្ទរបស់ជនរងគ្រោះ ខណ:ពេលគ្រោះថ្នាក់ចរាចរណ៍នោះ ត្រូវបានកម្លាំងសមត្ថកិច្ចប៉ុស្តិ៍ទួលសង្កែ ធ្វើការឃាត់ខ្លួន កាលពីវេលាម៉ោង២និង២០នាទីរសៀល ថ្ងៃទី២៦ ខែកញ្ញា ឆ្នាំ២០១៦ ដែលស្ថិតនៅក្នុងផ្សារដើមអំពិល ផ្លូវឧកញ្ញ៉ាម៉ុង រិទ្ធី ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះមានឈ្មោះ សុត ពៅ ភេទប្រុស អាយុ ២០ឆ្នាំ មុខរបរកម្មករកាត់ការ៉ូ ស្នាក់នៅផ្ទះជួល ផ្លូវបេតុង ភូមិទួលគោក សង្កាត់ទួលសង្កែ ខណ្ឌឫស្សីកែវ និងមានស្រុកកំណើតនៅភូមិអំពិលទឹក ឃុំកំពូតភ្នំ ស្រុកលើកដែក ខេត្តកណ្តាល ជាម្ចាស់ម៉ូតូម៉ាកហុងដាឌ្រីមសង់សេ១២៥ ស៊េរី២០១០ ពណ៌ខ្មៅ ពាក់ស្លាកលេខ កណ្តាល 1L-2476។ ចំណែកឯជនសង្ស័យឈ្មោះ ឃឿន សុភ័ណ្ឌ ហៅស្រី អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលកន្លែងកើតហេតុខាងលើ។
ប្រភពព័ត៌មានពីសមត្ថកិច្ចបានឲ្យដឹងថានៅថ្ងៃទី២៣ ខែកញ្ញា ឆ្នាំ២០១៦ វេលាម៉ោង ៧និង០៥នាទីយប់ ជនរងគ្រោះបានជិះម៉ូតូចេញពីបន្ទប់ជួលរបស់ខ្លួននៅសង្កាត់ទួលសង្កែ គោលបំណងទៅជួបជាមួយឈ្មោះ ភា និងភណ្ឌ័ នៅក្លឹប ម៉ារិន ដើម្បីអង្គុយហូបគ្រឿងស្រវឹងជាមួយគ្នា ហើយនិងរាំលេងកម្សាន្តនៅទីនោះ។ លុះដល់ម៉ោងប្រហែលជា ១១និង៥០នាទីយប់ ជនរងគ្រោះបានផឹកស្រាស្រវឹងតិចៗ ក៏បានសុំចេញមកផ្ទះមុន ខណ:ពេលដែលកំពុងជិះម៉ូតូតែម្នាក់ឯងត្រឡប់ទៅកន្លែងស្នាក់នៅរបស់ខ្លួនតាមបណ្តោយផ្លូវលេខ៥៩៨ ជិះក្នុងទិសដៅពីត្បូងទៅជើង ដល់ម្តុំមុខដីឡូតិ៍លីហួរ ហាងបញ្ជាំ និងដូរប្រាក់ ក៏ដួលម៉ូតូតែម្នាក់ឯង ដោយនៅក្នុងស្ថានភាពសន្លប់ ពេលនោះស្រាប់តែមានអ្នកនៅជិតនោះ បានចោមរោមមើល ភ្លាមៗនោះ ស្រាប់តែទូរស័ព្ទរបស់ជនរងគ្រោះមានគេខលចូលមកទូរស័ព្ទជនរងគ្រោះ ហើយត្រូវបានអ្នកនៅជិតនោះ យកទូរស័ព្ទរបស់ជនរងគ្រោះចុចទទួលហើយបាននិយាយថា អ្នកខលមកនេះ ត្រូវមិចជាមួយជនរងគ្រោះដែរ។ បន្ទាប់មក អ្នកខលចូលបាននិយាយប្រាប់ថា ខ្លួនគឺជាសង្សាររបស់ម្ចាស់ទូរស័ព្ទ ហើយអ្នកនិយាយទូរស័ព្ទជាមួយបាននិយាយប្រាប់ថា ម្ចាស់ទូរស័ព្ទត្រូវបានគ្រោះថ្នាក់ចរាចរសន្លប់មិនដឹងខ្លួនឡើយ។ ក្រោយពីឭបែបនេះ នារីជាសង្សារក៏បានជិះម៉ូតូកង់បី២នាក់មិត្តដែលជាជនសង្ស័យមកដល់កន្លែងកើតហេតុ បានលើកជនរងគ្រោះដាក់ទៅលើម៉ូតូកង់បី ដឹកយកនៅសង្គ្រោះបន្ទប់នៅមន្ទីរឯកជន ប្រសិទ្ធភាព នៅក្បែរកន្លែងកើតហេតុនោះ។
ប្រភពពីសមត្ថកិច្ចបានបន្តទៀតថា ក្រោយពីជនរងគ្រោះបានទៅដល់មន្ទីរពេទ្យ ហើយបានដឹងខ្លួន ដោយលោកគ្រូពេទ្យបាននិយាយថា មិនអីទេ គ្រាន់តែរងរបួសស្រាល ពេលនោះ ជនរងគ្រោះនិយាយប្រាប់ថា ចឹងខ្លួនអាចត្រឡប់ទៅផ្ទះវិញបានហើយមែនទេលោកគ្រូពេទ្យ ភ្លាមៗនោះ លោកគ្រូពេទ្យ និយាយប្រាប់ថា ថ្លៃថ្នាំពេទ្យដែលព្យាបាលនោះអស់ចំនួន ១០ដុល្លា ដោយសារតែគ្មានប្រាក់មួយរៀលជាប់នឹងខ្លួន ក៏បានពឹងឲ្យជនសង្ស័យយកទូរស័ព្ទ និងឲ្យជិះម៉ូតូរបស់ខ្លួនយកទៅបញ្ចាំដើម្បីយកប្រាក់មកសងថ្លៃព្យាបាល ហើយជនសង្ស័យក៏ទៅបាត់រហូតមិនឃើញត្រឡប់មកវិញសោះ។
លុះព្រឹកឡើងដោយមិនឃើញជនសង្ស័យយកម៉ូតូហើយនិងប្រាក់ត្រឡប់មកវិញ ក៏បានសម្រេចចិត្តមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទួលសង្កែ ដើម្បីឲ្យជួយអន្តរាគមន៍។
ក្រោយពីដាក់ពាក្យបណ្តឹងរួចមក ត្រូវបានកម្លាំងសមត្ថកិច្ចប៉ុស្តិ៍ទួលសង្កែ ធ្វើការស្រាវជ្រាវរហូតឈានដល់ការចាប់ឃាត់ខ្លួនយកមកប៉ុស្តិ៍ដើម្បីធ្វើការសាកសួរ និងកសាងសំណុំរឿងបញ្ជូនទៅអធិការដ្ឋាននគរបាលខណ្ឌឫស្សីកែវ ចាត់តាមនីតិវិធ្បាប់៕
//youtu.be/YlkGDeTu1Jo
មតិយោបល់