ភ្នំពេញ: លោក វេង សាខុន រដ្ឋមន្រ្តី ក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី២៦ ខែកញ្ញា ឆ្នាំ២០១៦នេះ បានអនុញ្ញាតឲ្យលោក Mark Rose នាយកប្រតិបត្តិអង្គការ សត្វព្រៃ និងរុក្ខជាតិអន្តរជាតិ និងសហការី ចូលជួបសម្តែងការគួរសម ពិភាក្សាការងារ និងរាយការណ៍ពីវឌ្ឍនភាពគម្រោង ដោយបានគាំទ្រគម្រោងបង្កើតទីតាំងទេសចរណ៍នៅក្បែរកោះរ៉ុង និងរ៉ុងសន្លឹម ដើម្បីភាពប្រសើរឡើង។
លោក Mark Rose បានជម្រាបជូនថា «អង្គការសត្វព្រៃ និងរុក្ខជាតិអន្តរជាតិ បានទទួលការសហការយ៉ាងជិតស្និទ្ធជាមួយ រាជរដ្ឋាភិបាលកម្ពុជា តាំងពីឆ្នាំ១៩៨៨ជាពិសេសជាមួយរដ្ឋបាលជលផល និងរដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ លើគម្រោងជាច្រើនដែលរួមមាន គម្រោងបង្កើតនិងគ្រប់គ្រងតំបន់ជលផលសមុទ្រនៅប្រជុំកោះរ៉ុងនិងកោះរ៉ុងសន្លឹម ,គម្រោងអភិរក្សអណ្ដើកសមុទ្រ , គម្រោងអភិរក្សក្រពើកម្ពុជា និងគម្រោងអភិរក្សដំរីព្រៃកម្ពុជា»។
លោកបន្តថា បច្ចុប្បន្នអង្គការកំពុងចាប់អារម្មណ៍ខ្លាំងទៅលើការពង្រឹងសមត្ថភាពសហគមន៍ជលផល និងអភិរក្សធនធានជលផលសមុទ្រ ប៉ុន្តែស្នើឲ្យក្រសួងជួយគាំទ្រ និងជម្រុញការបង្កើតជាទីតាំងទេសចរណ៍នៅក្បែរកោះរ៉ុង និងរ៉ុងសន្លឹម ដើម្បីអាចប្រមូលបាននូវចំណូលពីអ្នកទេសចរណ៍មុជទឹកកំសាន្ត មើលផ្កាថ្ម ក្នុងការបន្តគាំទ្រដល់ការការពារ និងអភិរក្សធនធានជលផលប្រកបដោយនិរន្តរភាព។
រដ្ឋមន្រ្តីកសិកម្ម លោក វេង សាខុន បានសម្តែងការកោតសរសើរចំពោះអង្គការសត្វព្រៃ និងរុក្ខជាតិអន្តរជាតិ ដែលបានខិតខំប្រឹងប្រែងការពារ និងអភិរក្សនូវធនធានជលផលសមុទ្រដល់កម្ពុជា។ លោករដ្ឋមន្រ្តីបានគាំទ្រដល់គម្រោងរៀបចំទីតាំងទេសចរណ៍កោះរ៉ុង និងរ៉ុងសន្លឹម ដើម្បីជាម៉ូដែលក្នុងការរកចំណូល តែត្រូវមានការសិក្សាឲ្យបានច្បាស់លាស់អំពីគោលការណ៍វិនិយោគរបស់ក្រុមហ៊ុនដែលកំពុងអភិវឌ្ឍន៍នៅលើទីតាំងទាំងនោះ ដើម្បីជៀសវាងការត្រួតគ្នានិង ផលប៉ះពាល់នូវគម្រោងទាំងនេះ។
លោករដ្ឋមន្រ្តី បានស្នើឲ្យអង្គការចូលរួមសហការជាមួយរាជរដ្ឋាភិបាល ក្នុងការសិក្សាពីលទ្ធភាពនៃការបង្កើនកម្រិតជីវភាពសហគមន៍ព្រៃឈើ ដើម្បីកាត់បន្ថយភាពក្រីក្រ ឆ្លើយតបទៅនឹងការវិវឌ្ឍនៃសេដ្ឋកិច្ច និងធានាបាននូវការគ្រប់គ្រងព្រៃប្រកបដោយនិរន្តភាព តាមរយ:បង្កើតការងារកសិកម្មបន្ថែមដល់សហគមន៍ ដូចជា ការចិញ្ចឹមសត្វគោ ការដាំដំណាំ។
សូមបញ្ជាក់ថា អង្គការនេះនឹងបន្តជួយធ្វើការសិក្សាបន្ថែមនូវលទ្ធភាពនៃការវិនិយោគលើរមនីយដ្ឋានទេសចរណ៍ នៅក្នុងសមុទ្រដែលស្ថិតនៅក្បែរទីតាំងកោះរ៉ុង និងរ៉ុងសន្លឹម ក្នុងទស្សន:រក្សានូវតុល្យភាពការអភិវឌ្ឍន៍ និងការអភិរក្ស ដោយសហការជាមួយអង្គភាពជំនាញរបស់ក្រសួងកសិកម្ម រុក្ខាប្រមាញ់និងនេសាទ៕
មតិយោបល់