កំពង់ធំៈ សកម្មភាពឈូសឆាយដីព្រៃរបស់រដ្ឋត្រូវបានគេដឹងថា មានមន្រ្តីសាលាស្រុកប្រាសាទសំបូរបានឃុបឃិតគ្នាជាប្រព័ន្ឋតាំងពីមេព្រៃ រហូតដល់ថ្នាក់ស្រុក បានរំលោភបំពានដីព្រៃរបស់រដ្ឋ យកគ្រឿងចក្រមក ឈូសឆាយដីព្រៃបម្រុងរបស់រដ្ឋជិត៥០ហិចតាដោយមិនញញើតច្បាប់នោះឡើយ។
ឈ្មួញដ៏សកម្មក្នុងការឈូសឆាយដីព្រៃ ត្រូវបានគេស្គាល់ឈ្មោះ ហោ តាំងអ៊ី ដែលបានយកតួនាទីកំបាំងមុខជាមន្ត្រីសាលាស្រុកប្រាសាទសំបូរបានយកគ្រឿងចក្រទៅឈូសឆាយដីព្រៃនៅចំណុចអូរអ្នកតាកែ ស្ថិតនៅភូមិសង្គមថ្មី ឃុំតាំងក្រសៅរ៏ ស្រុកប្រាសាទសំបូរ ខេត្តកំពង់ធំ ។
ជាក់ស្តែងនៅរសៀលថ្ងៃទី៣ ខែតុលា ឆ្នាំ២០១៦ សកម្មភាពឈូសឆាយដីព្រៃដីរាប់សិបហិចតា តែគេពុំឃើញមានការឈឺឆ្អាលពីសំណាក់អាជ្ញាធរ និងមេព្រៃនោះឡើយ បណ្តែតបណ្តោយឲ្យមានការយកគ្រឿងចក្ររបស់លោក ហោ តាំងអ៊ី ជាមន្ត្រីសាលាស្រុកប្រាសាទសំបូរ ទៅឈូសឆាយលើដីព្រៃបម្រុងដោយគ្រឿងចក្រ២គ្រឿងបានធ្វើសកម្មភាពជារៀងរាល់ថ្ងៃ ។
ទាក់ទងនឹងបញ្ហានេះដែរ លោក ហោតាំងអ៊ី មន្ត្រីសាលាស្រុកនិង ជាម្ចាស់គ្រឿងចក្រមិន អាចសុំការបំភ្លឺបានទេ ពីព្រោះទូរស័ព្ទចូលជាច្រើនដង តែគ្មានអ្នកលើកទទួលឡើយ។
ចំណែកលោក ខៀវ ប៉ាង អភិបាលស្រុកប្រាសាទសំបូរបានឆ្លើយថាដីនៅចំណុចនេះជាដីបម្រុងរបស់រដ្ឋ ហើយលោកមិនបានអនុញ្ញាតិឲ្យមានការឈូសឆាយទេ! បន្ទាប់ពីទទួលព័ត៍មាននេះបានហើយចាំលោកបញ្ជាឲ្យសមត្ថកិច្ចចុះទៅពិនិត្យទីតាំងនោះ។
លោក តឹប ញាតា នាយខណ្ឌរដ្ឋបាលព្រៃឈើខេត្តកំពង់ធំបានឲ្យដឹងថា បើដីមានប្លង់កម្មសិទ្ធិខេត្ត បានអនុញាតិឲ្យឈូសឆាយមែនតែបើមន្ត្រីរបស់លោកចុះទៅពិនិត្យនៅចំណុចនោះ ឃើញថាគ្មានប្លង់ទេ! លោកនឹងចាត់វិធានការតាមច្បាប់។
ក្នុងនោះដែរ ក៏មានការរិះគន់ពីសំណាក់បងប្អូនប្រជាពលរដ្ឋថា សកម្មភាព ឈូស ឆាយដីព្រៃបានកើតឡើងមិនឈប់ឈរនេះទំនងជាមានចរចារគ្នាទុកមុន ជាមួយមន្ត្រីជំនាញ និងអាជ្ញាធរ មូលដ្ឋាន ៕
មតិយោបល់