បាត់ដំបងៈ ជាងផ្សារដែកម្នាក់ បានស្លាប់ភ្លាមៗនៅនឹងកន្លែងកើតហេតុ ខណៈដែលជនរងគ្រោះបានផ្លាស់ប្តូរផ្លែម៉ូទ័រដើម្បីកាត់ដែក តែបែរជាប្តូរខុសផ្លែ បណ្តាលឲ្យផ្ទុះបែកផ្លែម៉ូទ័រនោះហោះទៅបុកទម្លុះដើមទ្រូង ធ្លាយដល់ថ្លើមស្លាប់ក្នុងថ្លុកឈាមយ៉ាងអាណោចអាធ័ម ។
យោងតាមរបាយការណ៍របស់សមត្ថកិច្ចមូលដ្ឋានបានឲ្យដឹងថា ហេតុការណ៍នេះបានកើតឡើងកាលពីថ្ងៃទី៥ ខែតុលា ឆ្នាំ២០១៦ វេលាម៉ោង១២ថ្ងៃត្រង់ ស្ថិតក្នុងភូមិកំពង់ឆ្លង ឃុំវត្តតាមិម ស្រុកសង្កែ ខេត្តបាត់ដំបង ។ ជនរងគ្រោះដែលរងរបួសខាងលើនេះមានឈ្មោះគី ភឿក ភេទប្រុស អាយុ១៨ឆ្នាំ មុខរបរជាងដែក ស្នាក់កន្លែងកើតហេតុខាងលើ ។
របាយការណ៍បានបន្តថា បើតាមការអះអាងពីសាក្សីដែលនៅទីនោះ បានឲ្យដឹងថា មុនពេលកើតហេតុជនរងគ្រោះបានយកម៉ូទ័រមកប្តូរផ្លែបម្រុងកាត់ដែក តែធាតុពិតម៉ូទ័រនោះគឺសម្រាប់ កាត់ការ៉ូតែប៉ុណ្ណោះ ដោយគេបានយកមកដាក់ផ្លែកាត់ដែកលុះពេលដែលគេកាត់ទៅលើដែកធ្វើឲ្យផ្លែនោះបែកខ្ចាយតែម្តង ដោយក្នុងនោះដែរក៏មានបំណែកមួយបានបុកទម្លុះចំកណ្តាលដើមទ្រូង ធ្លាយចូលទៅដល់ថ្លើមបណ្តាលឲ្យស្លាប់ភ្លាមៗនៅនឹងកន្លែងកើតហេតុតែម្តង។ ហើយករណីនេះ គឺផ្តើមចេញពីកំហុសបច្ចេកទេស ទើបបណ្តាលឲ្យមានគ្រោះថ្នាក់កើតឡើងបែបនេះ ។ ហើយបច្ចុប្បន្ន សាកសពជនរងគ្រោះត្រូវបានក្រុមគ្រួសាររៀបចំធ្វើបុណ្យតាមប្រពៃណី ៕
មតិយោបល់