ភ្នំពេញ: រដ្ឋបាលរាជធានីភ្នំពេញនឹងស្ថាបនាស្ពានឆ្លងកាត់ទន្លេសាបមួយកន្លែងទៀត ដើម្បីតភ្ជាប់ពីតំបន់អភិវឌ្ឍជ្រោយចង្វារមកកាន់តំបន់ឬស្សីកែវក្នុងគោលដៅសម្រួលការធ្វើចរាចរណ៍របស់ប្រជាពលរដ្ឋចេញចូលទៅក្នុងក្រុងឲ្យកាន់តែប្រសើរឡើងមួយកម្រិតទៀត ស្របពេលដែលរាជធានីនេះកំពុងប្រឈមនឹងការកកស្ទះចរាចរណ៍នោះ។
នេះបើតាមការបង្ហាញឲ្យដឹងរបស់លោកប៉ា សុជាតិវង្ស អភិបាលរាជធានីភ្នំពេញ ក្នុងកិច្ចប្រជុំជាមួយមន្រ្តីជំនាញសាលារាជធានីភ្នំពេញ ស្តីពីការស្ថាបនាផ្លូវថ្មីពីលើផ្លូវដែកចាស់ពីផ្លូវជាតិ៥ដល់ផ្លូវអ៊ែ៦ក្នុងតំបន់បឹងកក់នាព្រឹកថ្ងៃទី៧ ខែតុលា នេះ ដោយលោកបានអះអាងថា គម្រោងស្ថាបនាស្ពានឆ្លងកាត់ទន្លេសាបនេះអាចនឹង ត្រូវធ្វើឡើងនៅពេលឆាប់ៗនេះ ដោយត្រៀមកញ្ចប់ថវិការួចរាល់អស់ហើយ។
លោកអភិបាលបញ្ជាក់ថា ក្រុមមន្រ្តីជំនាញនឹងចុះសិក្សាពីទីតាំងដែលស្ថាបនាស្ពាននិងការ តភា្ជប់ជាមួយនឹងតំបន់អភិវឌ្ឍក្រុងរណបជ្រោយចង្វាររបស់ក្រុមហ៊ុនអូស៊ីអាស៊ី ដើម្បីបង្កើត ប្រពន្ធ័ចរាចរណ៍ឲ្យមានភាពស៊ីសង្វាក់គ្នាររវាងត្រើយខាងលិចនិងត្រើយខាងកើត។
លោកបញ្ជាក់ថា សម្រាប់ត្រើយខាងលិចនៃគម្រោងតភ្ជាប់ស្ពានថ្មីនេះ នឹងត្រូវភ្ជាប់មកលើផ្លូវ រថភ្លើងចាស់ស្ថិតនៅក្នុងសង្កាត់ឬស្សីកែវ ខណ្ឌឬស្សីកែវ ឆ្លងកាត់ផ្លូវជាតិលេខ៥ ហើយឆ្ពោះ ទៅផ្លូវលេខ៧០ទំនប់ទួលគោក។ លោកបញ្ជាក់ថា ដើម្បីពន្លឿនការស្ថាបនាស្ពានថ្មីនេះបាន អាជ្ញាធរបានសហការជាមួយក្រសួងសាធារណការនិងដឹកជញ្ជូនដើម្បីដកផ្លូវរថភ្លើងចាស់ ចេញនៅប៉ុន្មានថ្ងៃខាងមុខនេះ ដោយចាប់ពីផ្លូវជាតិលេខ៥ ដល់ផ្លូវអែ៦ តំបន់បឹងកក់ ហើយចាប់ផ្តើម ស្ថាបនាផ្លូវបេតុងថ្មីទំហំទទឹង៣០ម៉ែត្ររួមជាមួយនឹងការដោះស្រាយផលប៉ះពាល់ជូនប្រជាពលរដ្ឋពីគម្រោងអភិវឌ្ឍនេះ។
លោកអះអាងថានៅពេលដែលគម្រោងទាំង២នេះបានស្ថាបនារួច រាល់នោះវាបានជួយរំដោះបញ្ហាចរាចរណ៍ដ៏មមាញឹកនៅច្រកចូលក្នុងរាជធានីភ្នំពេញបានមួយចំណែកពីផ្លូវជាតិលេខ៥ត្រង់គីឡូម៉ែត្រលេខ៦ទៅដល់ស្ពានជ្រោយចង្វារ ពិសេសប្រជាពល រដ្ឋនៅតំបន់ឬស្សីកែវនេះដែលត្រូវឆ្លងកាត់តំបន់ជ្រោយចង្វារ ដោយមិនចាំបាច់ទៅឆ្លងស្ពានជ្រោយ ចង្វារទៀតនោះទេ។
លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញបានបញ្ជាក់ថា ការ ស្ថាបនាផ្លូវបេតុងថ្មីនេះ មានប្រជាពលរដ្ឋរងផលប៉ះពាល់ជាង១ពាន់គ្រួសារ ក្នុងនោះមានប្រជាពលរដ្ឋដែលប៉:ពាល់ផ្ទះទាំងស្រុងជាង៤០០គ្រួសារ។ លោកថា គម្រោងស្ថាបនាផ្លូវថ្មីពីលើ ផ្លូវរថភ្លើងចាប់ពីផ្លូវជាតិលេខ៥ដល់ផ្លូវអ៊ែ៦នេះមានប្រវែងជាង៦គីឡូម៉ែត្រ ទទឹង៣០ម៉ែត្រ ក្នុងនោះ កណ្តាលផ្លូវនឹងស្ថាបនាជាសួនច្បារដើម្បីពុះចែកផ្លូវជា២ខ្សែគឺផ្លូវទៅនិងមក ចំណែកសងខាង ផ្លូវ នឹងរក្សាទុកចំណីផ្លូវមួយចំណែកសម្រាប់ធ្វើផ្លូវថ្មើជើង ដាំដើមឈើ និងដាក់ប្រពន្ធ័លូនៅ ពីក្រោម។
សូមបញ្ជាក់ថា ប្រសិនបើអាជ្ញាធរស្ថាបនាស្ពាននេះតាមផែនការមែននោះ នឹងធ្វើឲ្យរាជធានីភ្នំពេញ មានស្ពានឆ្លងកាត់ទន្លេសាបចំនួន៤កន្លែង គឺមានស្ពានភ្លោះជ្រោយចង្វារ ស្ពានព្រែកភ្នៅ និងស្ពានត្រង់គីឡូម៉ែត្រលេខ៦ស្ថិតក្នុងខណ្ឌឬស្សីកែវនេះ៕
មតិយោបល់