ភ្នំពេញៈ តាំងពីថ្ងៃទី៥ តុលា តារាចម្រៀងល្បីឈ្មោះប្រចាំផលិតកម្មថោនគឺលោកខេម បានឡើងទៅដល់ទឹកដីបារាំង ដោយអមដំណើរជាមួយតារាចម្រៀងរួមទ្រនំគឺអ្នកនាង ចេន សាយចៃ។ អ្នកទាំង ពីរបើកឆាកច្រៀងកាលពីយប់ថ្ងៃទី៧ តុលា នៅប៉ារីស ខណៈដែលវត្តមានទៅច្រៀងរបស់អ្នកលោក និងតារាចម្រៀងរួមក្រុម គឺមិនបានទទួលតម្លៃខ្លួននោះទេ ដោយសារការចេញច្រៀងលក់សំបុត្រនេះ ដើម្បីយកលុយមកជួយដល់ក្មេងកំព្រានៅកម្ពុជា។

នៅមិនទាន់ដឹងថាតារាចម្រៀងខេមនឹងត្រូវចេញច្រៀងនៅក្នុងប្រទេសបារាំងរយៈពេលប៉ុន្មានឲ្យប្រាកដនៅឡើយទេ ដោយសារតែអ្នកធានាទៅបញ្ជាក់ថា ជាគម្រោងគឺមានរយៈពេល០៣សប្ដាហ៍ តែអាចពន្យារពេលបើមានគាំទ្របន្ថែម។ គម្រោងចេញច្រៀងរបស់អ្នកទាំងពីរ ជាការធានាចេញរបស់ប្រធានអង្គការ«ខ្ញុំខ្មែរ»ដែលមានមូលដ្ឋាននៅប្រទេសអូស្រ្តាលី ដើម្បីលក់សំបុត្រប្រមូលថវិកាយកមកធ្វើការបរិច្ចាគជួយដល់កុមារក្រីក្រ និងជនទុរគតនៅកម្ពុជា។

តំណាងអង្គការបានអះអាងថា ការធានាលោកខេម និងសាយចៃទៅច្រៀងនៅក្នុងប្រទេសបារាំងនៅខែតុលានេះ គឺដោយសារតែបងប្អូនខ្មែររស់នៅទីនោះមានការសំណូមពរច្រើន ហើយក៏ត្រូវនឹងពេលវេលាដែលខាងអង្គការត្រូវធ្វើប្រតិបត្តិការចេញច្រៀងលក់សំបុត្រ ដើម្បីស្វែងរកមូលនីធិជួយដល់ជនក្រីក្រនៅកម្ពុជា។ លោកថាក្នុងមួយឆ្នាំ អង្គការរបស់ត្រូវច្រៀងលក់សំបុត្រនៅប្រទេសបារាំង អាមេរិក និងអូស្រ្តាលី យ៉ាងហោចម្ដង អ៊ីចឹងហើយទើបតារាចម្រៀងខេម ក្រោយបញ្ចប់ការសម្ដែងជួយក្មេងកម្ពុជានៅក្នុងប្រទេសបារាំំង គឺនឹងមានដំណើរទៅច្រៀងនៅបណ្ដាប្រទេសផ្សេងទៀត។

យោងតាមតារាចម្រៀងចេន សាយចៃ អ្នកទាំងពីរនឹងច្រៀងលក់សំបុត្រធំនៅថ្ងៃទី២២ តុលាម្ដងទៀងនៅទីក្រុងលីយ៉ុង ដោយរំពឹងថាសន្ទុះគាំទ្រនឹងមិនអន់ជាងការបើកឆាកសម្ដែងកាលពីយប់ថ្ងៃទី៧ តុលានោះឡើយ៕