ភ្នំពេញ: បុរសម្នាក់បានរងរបួសបែកក្បាលហូរឈាម ដោយសារបើករថយន្តទៅបុកនឹងគល់ស្ពាន៥មករា ពេញទំហឹងបណ្ដាលឲ្យរថយន្តដាច់ក្រឡេកង់ ទៅមុខលែងរួច។ ហេតុការណ៍នេះបានកើតឡើងកាលពីវេលាម៉ោង ១និង១០នាទី រំលងអាធ្រាតឈានចូលថ្ងៃទី៨ ខែតុលា ឆ្នាំ២០១៦ ស្ថិតនៅស្ពាន៥មករា ទល់មុខនឹងសាកលវិទ្យាល័យ វិទ្យាសាស្រ្តនិងបច្ចេកវិទ្យា តេចណូ ក្នុងសង្កាត់ ទឹកល្អក់១ ខណ្ឌទួលគោក រាជធានីភ្នំពេញ ។

សម្ថកិច្ចចរាចរណ៍ប្រចាំការនៅស្ពានអាកាស៥មករា បានឲ្យដឹងថា មុនពេលកើតហេតុ មានរថយន្ត១គ្រឿងម៉ាកតូយ៉ូតា ព្រួសពណ៌ស ពាក់ស្លាក់លេខ ភ្នំពេញ 2AK-6885 បើកបរក្នុងល្បឿនលឿនខណ:មកដល់ចំណុចកើតហេតុ រថយន្តបង្កបានរេចង្កួតទៅបុកនឹងគល់ស្ពានយ៉ាងពេញទំហឹងបណ្ដាលឲ្យរថយន្ត រងការខូចខាតផ្នែកខាងឆ្វេងនិងដាច់ក្រឡេកង់បើកទៅមុខលែងរួច ចំណែកអ្នកបើករថយន្តខាងលើ បានចុះពីលើរថយន្ត រួចឡើងជិះតាក់ស៊ីទៅបាត់ ដោយរូបគេមានរបួសក្បាលឈាមហូរផងដែរ ។

ក្រោយពេលកើតហេតុ សមត្ថកិច្ចនគរបាលចរាចរណ៍ខណ្ឌទួលគោក បានចុះមកធ្វើការវាស់វែង ដល់កន្លែងកើតហេតុ និងបានប្រគល់រថយន្តខាងលើ យកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់រថយន្តចូលខ្លួនមកធ្វើការដោះស្រាយទៅតាមនិតីវិធីច្បាប់៕