ភ្នំពេញៈ ជនជាតិវៀតណាម១០នាក់ ស្រីម្នាក់ ក្នុងនោះមានជនជាតិថៃម្នាក់ផងដែរ ត្រូវសមត្ថកិច្ចចម្រុះចាប់ខ្លួន នៅពេលចុះប្រតិបត្តិការឆែកឆេរ និងត្រួតពិនិត្យនៅខណ្ឌដូនពេញកាលពីព្រឹកមិញ។

បើតាមភ្នាក់ងារ Post News មានវត្តមាននៅទីនោះបានរាយការណ៍មកថា ករណីនេះ គឺកម្លាំងនាយកដ្ឋានស៊ើបអង្កេត និងអនុវត្តនីតិវិធី សហការជាមួយស្នងការដ្ឋាននគរបាលរាជធានីភ្នំពេញ ក្រោមការបញ្ជាផ្ទាល់ពីនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ និងកម្លាំងសមត្ថកិច្ចខណ្ឌដូនពេញ ដោយមានការសម្របសម្រួលពីលោក សៀង សុខ ព្រះអាជ្ញារងអយ្យការអមសាលាដំបូងរាជធានីភ្នំពេញ ជាលទ្ធផលសមត្ថកិច្ចបានឃាត់ខ្លួនជនជាតិវៀតណាម១០នាក់ ដែលរស់នៅ និងធ្វើការខុសច្បាប់នៅកម្ពុជា។

ករណីចុះបង្ក្រាបជនជាតិវៀតណាមនេះ សមត្ថកិច្ចប្រាប់ថា បានធ្វើឡើងកាលពីវេលាម៉ោង១០និង១៥នាទីព្រឹកថ្ងៃទី០៨ ខែតុលា ឆ្នាំ២០១៦នេះ ស្ថិតនៅទីតាំងផ្ទះជាប់មាត់ទន្លេ ផ្លូវលំ ក្រុម២០៧ ភូមិ១៦ សង្កាត់ស្រះចក ខណ្ឌដូនពេញ រាជធានីភ្នំពេញ។

លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានបញ្ជាក់ថា ជនជាតិវៀតណាម ដែលស្នាក់នៅដោយខុសច្បាប់នោះ គឺមានចំនួន១០នាក់ ពុំមានលិខិតស្នាមអ្វីទាំងអស់។ ពាក់ព័ន្ធនិងករណីនេះផងដែរ លោកក៏បានធ្វើការអំពាវនាវ និងសុំឲ្យជនបរទេសដែលមកស្នាក់នៅ និងធ្វើការនៅកម្ពុជា ត្រូវមកសុំច្បាប់ និងគោរពតាមច្បាប់នៃប្រទេសកម្ពុជាផងដែរ បើពុំនោះទេ សមត្ថកិច្ចនឹងចាត់វិធានការដោយពុំលើកលែងនោះឡើយ។

លោកឧត្ដមសេនីយ៍ទោបានបន្តទៀតថា កន្លងមកលោកបានធ្វើការអំពាវនាវដល់ម្ចាស់រោងចក្រ សហគ្រាស សិប្បកម្ម និងការដ្ឋាននានាទាំងអស់ឲ្យបញ្ឈប់ការជួលកម្មករបរទេសដែលចូលមកខុសច្បាប់មកធ្វើការបន្តទៀត បើមិនដូច្នោះសមត្ថកិច្ចនិងចាត់វិធានការទៅតាមផ្លូវច្បាប់ ឬបណ្ដេញចេញពីប្រទេសកម្ពុជា ។ សមត្ថកិច្ចបញ្ជាក់ថា ជនបរទេសទាំងនេះ ត្រូវបាននាំខ្លួនទៅសាកសួរបន្ថែម នៅអគ្គនាយកដ្ឋានអន្តោប្រវេសន៍មុខព្រលានយន្តហោះអន្តរជាតិភ្នំពេញ រង់ចាំបំពេញឯកសារគ្រប់គ្រាន់ នឹងត្រៀមបណ្ដេញចេញទៅប្រទេសកំណើតវិញ៕

https://youtu.be/n2yYwiKoUfk