ឧត្តរមានជ័យៈ មានករណីព្រះសង្ឃមួយអង្គ ធ្វើអត្តឃាតសម្លាប់ខ្លួន បានកើតឡើងនៅចំណុច វត្តប្រាសាទសីមារ ហៅវត្តអូរអង្រែ ស្ថិតនៅក្នុងភូមិទួលប្រាសាទ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ កាលពីវេលាម៉ោង១៩និង១៥ នាទី ថ្ងៃទី៧ ខែតុលា ឆ្នាំ២០១៦ ។

បើតាមលោកវរសេនីយ៍ទោ ស៊ីម វណ្ណះ អធិការនគរបាលស្រុកអន្លង់វែង បានឲ្យដឹងថា ជនរងគ្រោះជាព្រះសង្ឃ ព្រះនាម នៅ ចាន់ថន ព្រះជន្ម ១៤ព្រះវស្សា គង់នៅវត្តអូរអង្រែ បានយកខ្សែ ធ្វើអត្តឃាតចងក សម្លាប់ខ្លួន ព្យួរនឹងមេជញ្ជាំងកុដិ កម្ពស់១ម៉ែត្រ ពីគ្រែបណ្តាលឲ្យសុគត ។

បន្ទាប់ពីទទួលព័ត៌មានបាន អធិការនគរបាលស្រុក បានដឹកនាំកម្លាំង ចុះទៅពិនិត្យនៅកន្លែងកើតហេតុភ្លាមៗ ឃើញថា ជនរងគ្រោះបានសុគត ដោយសារករណី អត្តឃាតពិតប្រាកដមែន មូលហេតុ៖ មានវិបត្តិផ្លូវចិត្ត ។ សព ត្រូវបានប្រគល់ ជូនក្រុមគ្រួសារ និងគណៈកម្មការវត្តរៀបចំធ្វើបុណ្យទៅតាមប្រពៃណី ៕