ភ្នំពេញៈ លោកសង្ឃ១អង្គ រួមនឹងយុវជន៥នាក់ ព្រមទាំងថ្នាំញៀន១កញ្ចប់ធំ ត្រូវកម្លាំងសមត្ថកិច្ចខណ្ឌឬស្សីកែវ ធ្វើការបង្ក្រាប កាលពីវេលាម៉ោង១១ព្រឹកថ្ងៃទី០៩ ខែតុលា ឆ្នាំ២០១៦ ត្រង់ចំណុចផ្ទះតាមមាត់ទន្លេ ស្ថិតនៅក្នុងភូមិក ក្រុម២ សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ។

លោក ម៉ៅ ចាន់ថុន នាយរងផ្នែកទទួលបន្ទុកព្រហ្មទណ្ឌខណ្ឌ បានប្រាប់ឱ្យដឹងថា កម្លាំងសមត្ថកិច្ចយើង បានធ្វើការស្រាវជ្រាវមុខសញ្ញានេះជាយូរមកហើយ ដោយពេលនេះ ទើបកម្លាំងសមត្ថកិច្ចយើង បានធ្វើការចាប់ឃាត់ខ្លួនជនសង្ស័យទាំង៦នាក់ ក្នុងនោះមានព្រះសង្ឃ១អង្គ ព្រមទាំងដកហូតម្សៅក្រាមពណ៌សថ្លា(ម៉ាទឹកកកICE)ចំនួន១កញ្ចប់ធំ និងម៉ូតូ ២គ្រឿង ហើយត្រូវបានកម្លាំងបញ្ជូនមកអធិការដ្ឋាននគរបាលខណ្ឌ ដើម្បីធ្វើការសាកសួរបន្ត។

លោក ម៉ៅ ចាន់ថុន បានបន្តទៀតថា ជនសង្ស័យទាំង៦នាក់ខាងលើនោះ ទី១.ឈ្មោះ ឈឹម រស់សុភ័ក្ត្រ ភេទប្រុស អាយុ២៣ឆ្នាំ មុខរបរ កម្មករ ទី២.ឈ្មោះ ហ៊ីង លីណា ភេទប្រុស អាយុ២០ឆ្នាំ មុខរបរ មិនពិតប្រាកដ អ្នកទាំង២នាក់ បច្ចុប្បន្នស្នាក់នៅភូមិ២១ សង្កាត់ចរាំងចំរេះ១ ខណ្ឌឫស្សីកែវ ទី៣.ឈ្មោះ អេង ម៉េងហុង ភេទប្រុស អាយុ១៨ឆ្នាំ មុខរបរ សិស្ស ស្នាក់នៅផ្ទះគ្មានលេខ ភូមិបឹងឈូក សង្កាត់គីឡូម៉ែត្រលេខ៦ ខណ្ឌឫស្សីកែវ ទី៤.ឈ្មោះ លន់ វឌ្ឍនា ភេទប្រុស អាយុ១៦ឆ្នាំ ជាព្រះសង្ឃ មានស្រុកកំណើតនៅភូមិក្រយាង ឃុំក្រយាង ស្រុកសន្ទុក ខេត្តកំពង់ធំ ទី៥.ឈ្មោះ សេន ម៉ាត់ហេ្សន ភេទប្រុស អាយុ៣៥ឆ្នាំ មុខរបរ លក់ដូរ ស្នាក់នៅផ្ទះលេខ២៣១៣ ក្រុម២ សង្កាត់ច្រាំងចំរេះ២ ខណ្ឌឫស្សីកែវ និងទី៦.ឈ្មោះ ស្រី សុខសិរីពង្សវឌ្ឍនៈ ភេទប្រុស អាយុ១៧ឆ្នាំ មុខរបរ ជាងដែក ស្នាក់នៅផ្ទះលេខ១៨២ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ ។

វត្ថុតាងដែលសមត្ថកិច្ចដកហូតបានរួមមាន ៖ ម្សៅក្រាមពណ៌សថ្លាចំនួន១កញ្ចប់ធំ ជាប្រភេទម៉ាទឹកកក និងម៉ូតូ២គ្រឿង ១ម៉ូតូម៉ាក ហុងដា សេ១២៥ ស៊េរី២០១០ ពណ៌ខ្មៅ ពាក់ស្លាកលេខ កំពង់ចាម 1B-3243 និងទី២ម៉ូតូម៉ាក ស្មាស់រេវ៉ូ សេ១១០ ស៊េរី២០០៨ ពណ៌ខ្មៅ ពាក់ស្លាកលេខ ភ្នំពេញ 1W-6358។

តាមការឆ្លើយសារភាពរបស់ជនសង្ស័យបានឲ្យដឹងថា ពួកគេបាននាំគ្នាទៅទិញថ្នាំញៀននោះនៅម្តុំរោងចក្រឆ្នាំង ដែលស្ថិតនៅក្នុងសង្កាត់បឹងកក់២ ខណ្ឌទួលគោក ដោយពួកគេទៅទិញក្នុងតម្លៃ១កញ្ចប់ ២៥០០០រៀលទៅ៣៥០០០រៀល មកប្រើប្រាស់។

គួរបញ្ជាក់ផងថា នៅតំបន់ម្តុំរោងចក្រឆ្នាំង ដែលស្ថិតនៅតាមបណ្តោយផ្លូវរថភ្លើងនៅក្នុងទឹកដីខណ្ឌទួលគោកនេះ គឺជាតំបន់ដ៏ស្មុគស្មាញសម្បូរទៅដោយក្រុមចោរលាក់ខ្លួននៅទីនោះ ពិសេសទៅទៀត គឺជាតំបន់គ្រឿងញៀនសម្បូរអ្នកចូលមកប្រើប្រាស់ និងចែកចាយគ្រឿងញៀន ថែមទាំងឈរលក់ដូចទំនិញក្នុងផ្សារទាំងថ្ងៃទាំងយប់ ដោយគ្មានសមត្ថកិច្ចក្នុងខណ្ឌទួលគោកណាម្ចាស់យកចិត្តទុកដាក់ក្នុងការបង្ក្រាបសោះ។

បច្ចុប្បន្នជនសង្ស័យទាំង៥នាក់ និងលោកសង្ឃ១អង្គ ព្រមទាំងវត្ថុតាងថ្នាំញៀនខាងលើ ត្រូវសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅកាន់តុលាការចាត់ការតាមនីតិវិធីច្បាប់៕

https://youtu.be/ZuuAD5nGkD0