ភ្នំពេញ: ក្រសួងសាធារណការ និងដឹកជញ្ជូន បានប្រកាសបើកឱ្យប្រើប្រាស់នូវម៉ាស៊ីនត្រួតពិនិត្យលក្ខណ:បច្ចេកទេសយានយន្តចល័តនៅថ្ងៃទី១១ ខែតុលា ស្អែកនេះ ក្រោមវត្តមានលោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន នៅមណ្ឌលត្រួតពិនិត្យលក្ខណ:បច្ចេកទេសយានយន្តសាខាទី១ចម្ការដូង រាជធានីភ្នំពេញ។

គោលបំណងសំខាន់នៃការដាក់ឱ្យប្រើប្រាស់ម៉ាស៊ីនត្រួតពិនិត្យនេះ គឺ ដើម្បីបង្ខិតសេវាសាធារណ:ឱ្យកាន់តែជិតប្រជាពលរដ្ឋ បង្កភាពងាយស្រួល ចំណាយពេលវេលា កាត់បន្ថយគ្រោះថ្នាក់ចរាចរណ៍ និងការចំណាយផ្សេងៗ។

ម៉ាស៊ីននេះនឹងធ្វើការចល័តគ្រប់២៥ខេត្តក្រុង ដើម្បីឱ្យប្រជាពលរដ្ឋយកយានយន្តរបស់ខ្លួន មកត្រួតពិនិត្យលក្ខណ:បច្ចេកទេសបានគ្រប់ៗគ្នានៅក្នុងបណ្ដាខេត្តដែលខ្លួនរស់នៅ។ ប្រជាពលរដ្ឋមិនចាំបាច់ធ្វើដំណើរមកត្រួតពិនិត្យលក្ខណ:បច្ចេកទេសយានយន្តនៅរាជធានីភ្នំពេញ ដូចពេលមុនៗទៀតឡើយ៕