បន្ទាយមានជ័យ: ថ្លែងក្នុងពិធីប្រកាសផ្លាស់ប្ដូរ ប្រធានពន្ធនាគារខេត្តបន្ទាយមានជ័យ នារសៀលថ្ងៃទី១០ ខែតុលា ឆ្នាំ២០១៦ លោក ឈើយ ចាន់ណា អភិបាលរងខេត្តបន្ទាយមានជ័យ សង្ឃឹមថា ប្រធានពន្ធនាគារថ្មី មិនឲ្យមានអ្នកទោសប្រព្រឹត្តបទល្មើសដូចសារព័ត៌មាន ចុះផ្សាយទៀតឡើយ។

ពិធីប្រកាសផ្លាស់ប្តូរនេះ ប្រព្រឹត្តទៅក្រោមអធិបតីភាពលោក ហេង ហាក់ អនុរដ្ឋលេខាធិការក្រសួងមហាផ្ទៃ និងលោក ចាន់ គឹមសេង ប្រធានអគ្គនាយកដ្ឋានពន្ធនាគារព្រមទាំងមានការចូលរួមពីប្រធានស្ថាប័ន ជុំវិញខេត្តផងដែរ។

យោងតាមសេចក្តីសម្រេចរបស់ក្រសួងមហាផ្ទៃ បានប្រគល់ភារកិច្ចជូនលោកវរអគ្គានុរក្សថ្នាក់លេខ១ អ៊ុង ស៊ីផាន ពីអនុប្រធានទៅជាប្រធានពន្ធនាគារខេត្តបន្ទាយមានជ័យ ជំនួសលោក ហ៊ិន សុផល ដែលចូលនិវត្តន៍ និងលោកវរអគ្គានុរក្សថ្នាក់លេខ២ ឆង ឈីន ជាអនុប្រធានពន្ធនាគារខេត្ត លោកវរអគ្គានុរក្ស ថ្នាក់លេខ៣ សោម យិន សាវធ ជាប្រធានការិយាល័យមធ្យោបាយ នៃពន្ធនាគារខេត្ត។

លោក ហ៊ិន សុផល ប្រធានពន្ធនាគារដែលចូលនិវត្តន៍ បានលើកឡើង ពីស្ថានភាពពន្ធនាគារបច្ចុប្បន្ន មានអ្នកទោសចំនួន១២៣០នាក់ ក្នុងនោះស្ត្រី១១៩នាក់ ដែលជាចំនួនច្រើនពីមួយខែទៅមួយខែ៕