ភ្នំពេញ: ជនសង្ស័យម្នាក់ ត្រូវកម្លាំងសមត្ថកិច្ចខណ្ឌព្រែកព្នៅ សហការជាមួយកម្លាំងសមត្ថកិច្ចប៉ុស្តិ៍ បានធ្វើការឃាត់ខ្លួន កាលពីវេលាម៉ោង ១២និង០០នាទី ថ្ងៃទី១០ ខែតុលា ឆ្នាំ២០១៦ ដែលស្ថិតនៅតាមបណ្តោយផ្លូវជាតិលេខ៥ ក្នុងភូមិពោធិមង្គល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ តាមពាក្យបណ្តឹងរបស់ជនរងគ្រោះ។

សមត្ថកិច្ចឲ្យដឹងថា ជនសង្ស័យឈ្មោះ ចាន់ ផល្លា ភេទប្រុស អាយុ២៩ឆ្នាំ ជនជាតិខ្មែរ មុខរបរ កម្មករសែងត្រី ស្នាក់នៅភូមិឡកំបោ សង្កាត់ស្វាយប៉ាក ខណ្ឌឫស្សីកែវ។ ចំណែកជនរងគ្រោះឈ្មោះ សំ ថាញ់ ភេទប្រុស អាយុ៣៦ឆ្នាំ ជនជាតិវៀតណាម មុខរបរ ជាងសំណង់ ស្នាក់នៅភូមិពោធិមង្គល សង្កាត់ព្រែកព្នៅ ខណ្ឌព្រែកព្នៅ ជាម្ចាស់ម៉ូតូម៉ាស៊ីរូស ពណ៌ខ្មៅ ស៊េរី២០០៨ ពាក់ស្លាកលេខ សៀមរាប 1A-0485។

សមត្ថកិច្ចបានឲ្យដឹងទៀតថា កាលពីម៉ោងប្រហែល៧យប់ថ្ងៃទី៤ ខែតុលា ឆ្នាំ២០១៦ ជនរងគ្រោះបានទុកម៉ូតូនៅចិញ្ចើមផ្លូវលំ ដែលស្ថិតនៅក្នុងភូមិពោធិមង្គល សង្កាត់ព្រែកព្នៅ បន្ទាប់មកជនរងគ្រោះក៏បានដើរចូលទៅបែរចិញ្ចឹមត្រីនៅមាត់ទន្លេសាបចម្ងាយប្រហែលជា១៥០ម៉ែត្រពីម៉ូតូរបស់ខ្លួន។ មួយស្ទុះក្រោយមកក៏បានដើរត្រឡប់មកវិញ ស្រាប់តែមិនបានឃើញម៉ូតូ។ ភ្លាមៗនោះ មានឈ្មោះ ឡេ យ៉ាំងយូ ភេទប្រុស ជាអ្នកស្គាល់គ្នាបានប្រាប់ថា ម៉ូតូរបស់ខ្លួនត្រូវឈ្មោះ ចាន់ ផល្លា បានលួចយកម៉ូតូទៅបាត់ហើយ។ ក្រោយពីកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រែកព្នៅ ដើម្បីឲ្យសមត្ថកិច្ចជួយអន្តរាគមន៍ និងស្វែងរកជនសង្ស័យយកមកចាត់ការ។

ក្រោយពីសមត្ថកិច្ចបានទទួលពាក្យបណ្តឹងពីជនរងគ្រោះរួចមក កម្លាំងសមត្ថកិច្ចខណ្ឌ និងប៉ុស្តិ៍បានធ្វើការស្រាវជ្រាវកំណត់មុខសញ្ញារហូតដល់វេលាម៉ោង១២ថ្ងៃទី១០ ខែតុលា ឆ្នាំ២០១៦ ទើបកម្លាំងសមត្ថកិច្ចឃាត់ខ្លួនជនសង្ស័យ នាំយកមកសាកសួរនៅប៉ុស្តិ៍។

ក្រោយពីធ្វើការសាកសួរជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពលួចយកម៉ូតូរបស់ជនរងគ្រោះពិតប្រាកដមែន ដោយបានយកទៅបញ្ជាំនៅម្តុំឃ្លាំងរំសេវ ដែលស្ថិតនៅក្នុងសង្កាត់ទឹកល្អក់៣ ខណ្ឌទួលគោក ហើយសមត្ថកិច្ចបានធ្វើការដកហូតម៉ូតូមកប្រគល់ឲ្យជនរងគ្រោះវិញ។

បច្ចុប្បន្នជនសង្ស័យ ត្រូវបានសមត្ថកិច្ចឃុំនខ្លួនជាបណ្តោះអាសន្ននៅអធិការដ្ឋាននគរបាលខណ្ឌព្រែព្នៅ ដើម្បីកសាងសំណុំរឿង បញ្ជូនទៅកាន់តុលាការចាត់ការបន្តតាមនីតិវិធីច្បាប់៕