ស្ទឹងត្រែង: កម្លាំងការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តស្ទឹងត្រែង ធ្វើការចាប់ឃាត់ខ្លួនបុរសជនជាតិឡាវម្នាក់ ពីបទជួញដូរនូវសារធាតុញៀនខុសច្បាប់ ដកហូតបានថ្នាំញៀនមួយថង់ធំ ។ប្រតិបត្តិការណ៍នេះបានធ្វើឡើងកាលពីវេលាម៉ោង ៩ព្រឹកថ្ងៃទី១២ ខែតុលា ឆ្នាំ២០១៦ ស្ថិតនៅចំណុចដុងក្រឡ ក្នុងភូមិខាំផាន់ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបានខាងលើនេះមានឈ្មោះ
ឡុត ផន ភេទប្រុស អាយុ៤០ឆ្នាំ ជនជាតិឡាវ មានស្រុកកំណើតភូមិថាខ ក្រុមទី៦ ស្រុកខូង ខេត្តចំប៉ាសាក់ ប្រទេសឡាវ ។ ក្នុងប្រតិបត្តិការណ៍នេះដែរ សមត្ថកិច្ចធ្វើការដកហូតបានវត្ថុតាងថ្នាំញៀនប្រភេទមេតំហ្វេតាមីន (ICE)ចំនួនមួយកញ្ចប់ធំ ដែលមានទម្ងន់ស្មើនឹង ១៩៤.២ក្រាម។

បច្ចុប្បន្ន ជនសង្ស័យរួមទាំងវត្ថុតាងខាងលើត្រូវបានសមត្ថកិច្ចនាំយកមកកាន់ស្នងការដ្ឋាននគរបាលខេត្តស្ទឹងត្រែងព្រមទាំងរៀបចំសំណុំរឿងដើម្បីបញ្ជូនខ្លួនបន្តទៅកាន់តុលាការចាត់ការតាមផ្លូវច្បាប់ ៕