ភ្នំពេញៈ សមាជិកសភា រដ្ឋអូស្ត្រាលី ភាគខាងត្បូង មានបំណងចង់បង្កើតសម្ព័ន្ធភាពរវាងទីក្រុង អាដឺឡេត ជាមួយទីក្រុងណាមួយក្នុងប្រទេសកម្ពុជា ក្នុងគោលបំណងបង្កើនទំនាក់ទំនងលើវិស័យសំខាន់ៗមួយចំនួន។ ការចង់បង្កើតសម្ព័ន្ធភាពនេះ ធ្វើឡើងក្នុងពេលដែលសមាជិកសភា រដ្ឋអូស្ត្រាលីភាគខាងត្បូង លោក David Ridgway និងលោក Terry Stephens បានទទួលជួបស្វាគមន៍លោក ហ៊ុន ម៉ាណែត និងឯកអគ្គរាជទូតកម្ពុជា លោក កុយ គួង ព្រមទាំងក្រុមការងារនៅមានរដ្ឋសភាទីក្រុង អាឌឺឡែត រដ្ឋអូស្ត្រាលី ភាគខាងត្បូង នៅព្រឹកថ្ងៃទី១២ ខែតុលា ឆ្នាំ២០១៦។

ក្នុងជំនួបរវាងលោក ហ៊ុន ម៉ាណែត ជាមួយនឹងសមាជិកសភាអូស្ត្រាលី គឺត្រូវគេឃើញថា តែងតែស្វែងរកឱកាសវិនិយោគពីអូស្ត្រាលី មកកម្ពុជា និងឱកាសសិក្សា និងការងារសម្រាប់និស្សិត ព្រមទាំងពលករខ្មែរ នៅប្រទេសអូស្ត្រាលី។ ក្នុងជំនួបនោះ គឺសមាជិកសភារូបនោះ ចង់បង្កើនកិច្ចសហប្រតិបត្តិការវិស័យកាសចរណ៍ ដែលអាចហោះហើរផ្ទាល់ពីទីក្រុង អាដឺឡែត មកទី ក្រុងភ្នំពេញ ឬទីរួមខេត្តសៀមរាប នៃប្រទេសកម្ពុជា ដែលនឹងជួយបង្កើនភ្ញៀវទេសចរ និងអ្នកវិនិយោគរបស់អូស្ត្រាលី មកកាន់ប្រទេសកម្ពុជា ផងដែរ។

ជំនួបដដែល សមាជិកសភា នៅបានស្នើសុំឲ្យស្ថាប័នពាក់ព័ន្ធជួបគ្នា ដើម្បីពង្រឹងវិស័យទេសចរណ៍ សិក្សាធិការ វប្បធម៌ និងពាណិជ្ជកម្ម។ ចំណែកអ្នកជំនួញធំម្នាក់ នៅ អាដឺឡេត គឺលោក Rendal Tommic កំពុងសិក្សាពីលទ្ធភាពនៃស្រាដែលលោកផលិតខ្លួនឯងទៅលក់នៅប្រទេសកម្ពុជា ទៀតផង គ្រាដែលលោកឃើញឱកាសវិនិយោគល្អ សម្រាប់អ្នកជំនួញអូស្ត្រាលី នៅកម្ពុជានោះ។

គួរជម្រាបថា គណៈប្រតិភូរបស់លោក ហ៊ុន ម៉ាណែត និងឯកអគ្គរាជទូតខ្មែរ លោក កុយ គួង កាលពីថ្ងៃទី១០ ខែតុលា ក៏បានជួបជាមួយសមាជិកសភា ចំនួន៥រូប នៃរដ្ឋញ៉ូវសោតវ៉ែល (ទីក្រុងស៊ីដនី) បានទទួលស្វាគមន៍ និងជួបពិភាក្សាការងារផងដែរ។ សមាជិកសភាទាំង៥នាក់ រួមមាន លោកស្រី Amanda Fazia លោក Nick Lalich លោក Guy Zabgari លោក Emest Wong និងលោក Shaoquett Moselmane។ ក្នុងជំនួបពិភាគ្សា គឺភាគីទាំង២ បានលើកឡើងពីកិច្ចសហប្រតិបត្តិការលើវិស័យសង្គមកិច្ច ទេសចរណ៍ អប់រំ សុខាភិបាល និងពាណិជ្ជកម្ម ដោយខិតខំធ្វើយ៉ាងណាជំរុញពាណិ្ជកម្មប្រទេសទាំង២ ឲ្យកាន់តែប្រសើរឡើង។

គួរបញ្ជាក់បន្ថែមថា បច្ចុប្បន្ន អត្រាការផ្លាស់ប្តូរពាណិជ្ជកម្មរវាងកម្ពុជា និងអូស្ត្រាលី ឆ្នាំ២០១៥ មានរហូតដល់១៥០លានដុល្លារ ក្នុង១ឆ្នាំ។ ពាក់ព័ន្ធវិស័យ អប់រំនោះវិញ ក្រៅពីប្រទេសអូស្ត្រាលី ផ្តល់អាហារូបករណ៍ឲ្យសិស្សកម្ពុជា ចន្លោះពី៥០ ទៅ៥៥អាហារូបករណ៍ គឺនិស្សិតកម្ពុជា អាចស្រាវជ្រាវផ្ទាល់កម្មវិធីអាហារូបករណ៍បន្ថែមទៀត តាមកម្មវិធីសកលវិទ្យាល័យនីមួយៗ ដែលគេផ្តល់ឲ្យតែម្តង។ ក្នុងនោះដែរ អូស្ត្រាលី បានបញ្ជូនអ្នកស្ម័គ្រចិត្តខ្លួនទៅកម្ពុជា ដើម្បីជួយកិច្ចការសង្គម ដូចជា អប់រំ សុខាភិបាល ដែលហៅថា ក្រុម Volunteer។

មិនត្រឹមតែប៉ុណ្ណោះ កិច្ចពិភាក្សាក៏បានលើកឡើងពីការចាប់អារម្មណ៍ចង់បន្តទិដ្ឋការជូនប្រជាពលរដ្ឋអូស្ត្រាលី ដើម្បីស្នាក់នៅកម្ពុជា ពី៦ខែ ទៅ១ឆ្នាំ ដោយសារតែឃើញកម្ពុជា មានស្ថិរភាពនយោបាយ សេដ្ឋកិច្ចរីកចម្រើន ហើយប្រជាពលរដ្ឋខ្មែរ រួសរាយរាក់ទាក់ ចំណែកការកំណត់តម្លៃសេវាទូទៅរវាងជនប្រទេស និងប្រជាជនកម្ពុជា គឺតែមួយ និងមានកន្លែងទេសរណ៍ល្អជាច្រើន ដែលប្រទេសជិតខាងដទៃមិនមាន៕