ក្រចេះ: ប្រជាពលរដ្ឋបានធ្វើការរិះគន់ថា នៅភូមិសាស្រ្តស្រុកស្នួលចាប់ពីឃុំស្វាយជ្រះរហូតទល់ទីប្រជុំជនស្រុកស្នួល គេសង្កេតឃើញមានឡានស៊េរីទំនើបៗ ចតហូរហែតាមចិញ្ចើមផ្លូវទាំងថ្ងៃទាំងយប់ រង់ចាំប្រដេញកាក់ពលរដ្ឋដឹកឈើតាមម៉ូតូប្រសេកប្រសាចយ៉ាងអនាធិបតេយ្យ គ្មានសណ្តាប់ធ្នាប់ទាល់តែសោះ។

ប្រជាពលរដ្ឋមួយចំនួនដែលបានឃើញហេតុការណ៍នេះរាល់ថ្ងៃ បានលើកជាមតិរិះគន់ថា ភាគច្រើនក្រុមរថយន្តទំនើបៗទាំងនោះ ជារបស់សមត្ថកិច្ចមិនដឹងមកពីស្ថាប័នណាខ្លះទេ  ពួកគេជានិច្ចកាលតែងធ្វើសកម្មភាពកាក់ប្រដេញម៉ូតូដឹកឈើពេញដងផ្លូវស្ទើរ២៤ម៉ោង ជាហេតុងាយនឹងបង្កគ្រោះថ្នាក់ចរាចរណ៍ខ្លាំណាស់។ សកម្មភាពទាំងនោះ បានកើតឡើង ជាទម្លាប់ និងជាប្រពៃណីទៅហើយ នៅលើដងផ្លូវជាតិលេខ៧ ក្នុងភូមិសាស្រ្ត ស្រុកស្នួល។ បច្ចុប្បន្នសកម្មភាពទាំងនេះ មិនដែលឃើញគណ:បញ្ជាការឯកភាពស្រុកស្នួល មានចំណាត់ការចំពោះការដឹកឈើបែបអនាធិប្បតេយ្យ និងក្រុមកុងត្រូលជជុះ ដែលតែងតែដេញជំរិតទារប្រាក់ពីម៉ូតូដឹកឈើប្រសេកប្រសាចតាមផ្លូវនោះឡើយ។

ប្រជាពលរដ្ឋរស់នៅស្រុកស្នួលបានបញ្ជាក់ថា គិតចាប់ពីចំណុចភូមិសាស្រ្តឃុំស្វាយជ្រះ រហូតទល់ទីប្រជុំជនស្រុកស្នួល គេឃើញមានឡានស៊េរីទំនើបៗ ប្រភេទហាយឡែនឌ័រ កាមរីឆ្លាម បាឡែន កាមរីគូថហើម និងនៅចំណុចស្នាក់ការអចិន្ត្រៃមួយចំនួនរបស់សមត្ថកិច្ចជំនាញ គឺបានដាក់មនុស្សដោយមានបិទម៉ាស់មុខ ដោយខ្លាចគេចំណាំ ដើម្បីឈររង់ចាំបក់ដៃ ដេញកាក់ហៅក្រុមអ្នកស៊ីឈ្នួលដឹកឈើប្រណីតឲ្យថៅកែធំៗ តាមម៉ូតូ ដើម្បី ទារប្រាក់ពីពួកគេ ដោយមិនមានខ្លាចច្បាប់បន្តិចសោះឡើយ។

ទាក់ទងនឹងបញ្ហាកុងត្រូលជជុះបែបអនាធិបតេយ្យតាមដងផ្លូវជាតិលេខ៧ ក្នុងភូមិសាស្រ្តខាងលើ លោក អ៊ូ ដានី នាយករដ្ឋបាលសាលាស្រុកស្នួល បានបញ្ជាក់ឲ្យដឹងថា លោកនឹងពិភាក្សា ព្រមទាំងស្នើសុំយោបល់ពីលោកអភិបាលស្រុកស្តីទី ម៉ែន វណ្ណា ដើម្បីមានចំណាត់ការបន្ទាន់លើបញ្ហានេះ។  លោកបានបន្តថា លោកនឹងរាយការណ៍ទៅថ្នាក់លើចំពោះការដាក់កុងត្រូលជជុះបែបអនាធិបតេយ្យរបស់ស្ថាប័នពាក់ព័ន្ធទាំងនោះ ដើម្បីរក្សាឲ្យបាននូវសុខ និងសុវត្ថិភាពចរាចរណ៍សម្រាប់ប្រជាពលរដ្ឋធ្វើដំណើរតាមដងផ្លូវសាធារណ:៕