បន្ទាយមានជ័យ: បុរសម្នាក់ ត្រូវបានក្រុមគ្រួសារបញ្ជូនទៅមន្ទីរពេទ្យបង្អែកស្រុកថ្មពួកភ្លាមៗ ដើម្បីសង្គ្រោះបន្ទាន់ បន្ទាប់ពីពស់ស្រកាចាស់ចឹក កាលពីវេលាម៉ោង១០យប់ថ្ងៃទី១១ ខែតុលា ឆ្នាំ២០១៦ ម្សិលមិញនេះ នៅចំណុចភូមិបន្ទាយឆ្មារត្បូង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។

សមត្ថកិច្ចបានប្រាប់ឲ្យដឹងថា បុរសរងគ្រោះមានឈ្មោះ ឡី ឡើយ អាយុ៥២ឆ្នាំ រស់នៅចំណុចចកើតហេតុខាងលើ។ ហើយនៅយប់កើតហេតុ បុរសរូបនេះ បានដើរទៅមាត់ស្រះខាងក្រោយភូមិ ដើម្បីរកមើលត្រីឡើង ព្រោះមេឃភ្លៀងទើបនឹងរាំង។ តែពេលដើរទៅដល់មាត់ស្រះគាត់រវល់តែឆួលរកមើលត្រី ជើងក៏ជាន់លើកម្ពោធតូចមួយ ដែលពស់ស្រកាចាស់សម្ងំនៅ ហើយត្រូវពស់នោះចឹកតែម្តង។

ក្រោយកើតហេតុ ក្រុមគ្រួសារបាននាំគ្នាដឹកបញ្ជូនភ្លាមៗទៅកាន់មន្ទីរពេទ្យ ដោយមានការយកចិត្តទុកដាក់ពីក្រុមគ្រូពេទ្យ ទើបជួយសង្គ្រោះជនរងគ្រោះឲ្យរួចផុតពីសេចក្តីស្លាប់បាន។ បច្ចុប្បន្នជនរងគ្រោះកំពុងសម្រាកព្យាបាលនៅក្នុងមន្ទីរពេទ្យបង្អែកស្រុកថ្មពួក។

បើតាមរបាយការណ៍របស់មន្ទីរសុខាភិបាលខេត្តបន្ទាយមានជ័យបានបញ្ជាក់ថា ករណីខាងលើនេះកើតមានច្រើនលើកមកហើយក្នុងឆ្នាំ២០១៦នេះ ហើយភាគច្រើនកើតមាននៅក្នុងស្រុកថ្មពួក និងស្រុកអូរជ្រៅនៃខេត្តបន្ទាយមានជ័យតែអ្នកស្លាប់ដោយករណីនេះមិនទាន់មាននៅឡើយទេ៕