ភ្នំពេញៈ អ្នកប្រើប្រាស់គ្រឿងញៀនចំនួន១២នាក់ក្នុងស្រីម្នាក់ រួមទាំងឧបករណ៍សេពថ្នាំញៀន ត្រូវបានកម្លាំងនៃអធិការដ្ឋាននគរខណ្ឌសែនសុខ ដោយទទួលបញ្ជាពីលោក ម៉ក់ ហុង​ អធិការខណ្ឌ ធ្វើការបង្ក្រាបដើម្បីរក្សាសន្តិសុខក្នុងមូលដ្ឋាន នៅរសៀលម៉ោង៣និង៣០នាទី ថ្ងៃទី១២ ខែតុលា ឆ្នាំ២០១៦ ស្ថិតនៅមុខមន្ទីរពេទ្យព្រះកុសុមៈ ភូមិត្រពាំងឈូក ឬបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។

សមត្ថកិច្ចបានឲ្យដឹងថា ក្រោយទទួលបញ្ជាពីលោក ម៉ក់ ហុង​ អធិការនៃអធិការដ្ឋាននរគបាលខណ្ឌសែនសុខ ចុះមកឆ្មក់បង្ក្រាបទីតាំងដែលចាប់មិនចេះអស់ខាងលើនេះ បានចំនួន១២នាក់ក្នុងនោះមានស្រីម្នាក់ ដកហូតបានឧបករណ៍ប្រើប្រាស់គ្រឿងញៀនមួយចំនួន ព្រមទាំងថ្នាំញៀនយ៉ាម៉ាពណ៌ផ្កាឈូក២ទៅ៣គ្រាប់ ។

បច្ចុប្បន្ន ជនសង្ស័យត្រូវបានបញ្ជូនទៅឃុំខ្លួនបណ្តោះអាសន្ននៅអធិការដ្ឋាននរគបាលខណ្ឌសែនសុខ​ ដើម្បីត្រួតពិនិត្យទឹកនោម និងកសាងសំណុំរឿងចាត់ការតាមនីតិវិធី ៕