ភ្នំពេញៈ គ្រោះថ្នាក់ចរាចរណ៍មួយបានកើតឡើង បន្ទាប់ពីបុរសម្នាក់ បានបើករថយន្តបត់ឆ្លងផ្លូវ មិនមើលមុខក្រោយ បណ្តាលឲ្យនារីម្នាក់ដែលកំពុងជិះម៉ូតូតាមផ្លូវត្រង់ ចាប់ហ្វ្រាំងមិនទាន់ជ្រុលបុកពេញទំហឹងរងរបួសបាក់ជើងម្ខាង ។ ហេតុការណ៍នេះបានកើតឡើងកាលពីវេលាម៉ោង៧ និង២០នាទីយប់ថ្ងៃទី១២ ខែតុលា ឆ្នាំ២០១៦នៅតាមបណ្តោយផ្លូវជាតិលេខ៣ ភូមិព្រៃព្រីង ខាងត្បូងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តបង្កម៉ាក កាមរីគូទហើម ពណ៌ខៀវ ពាក់ស្លាកលេខ ភ្នំពេញ 2C-5058 បើកបរឆ្លងផ្លូវ ក្នុងទិសដៅពីលិចទៅកើត ។ចំណែកម៉ូតូរបស់ជនរងគ្រោះម៉ាកហុងដាសេ១២៥ ពាក់ស្លាកលេខ ភ្នំពេញ 1CJ-9801 បើកបរដោយនារីម្នាក់ឈ្មោះ ស៊ុ ស្រីល័ក្ខ អាយុ៣១ឆ្នាំ មុខរបរកម្មកររោងចក្រ ស្នាក់នៅភូមិឃ្លះសណ្តាយ សង្កាត់ពងទឹក ខណ្ឌដង្កោ រាជធានីភ្នំពេញ បើកបរពីជើងទៅត្បូងជិះម្នាក់ឯង តាមបណ្តោយផ្លូវជាតិលេខ៣ ក្នុងទិសដៅពីជើងទៅត្បូង លុះបើកមកដល់ចំណុចកើតហេតុក៏មាន រថយន្តបង្កបើកឆ្លងកាត់ទទឹងផ្លូវ ហើយត្រូវម៉ូតូជនរងគ្រោះជាន់ហ្វ្រាំងមិនទាន់ក៏បុករថយន្តខាងលើពេញទំហឹង បណ្តាលឲ្យដួលរងរបួសបាក់ជើងខាងស្តាំតែម្ដងត្រូវបានរថយន្តរបស់អង្គភាព៧១១ នៃកងពលតូចលេខ៧០ បានដឹកទៅមន្ទីរពេទ្យព្រះកុសុមៈ ។

ក្រោយពីកើតហេតុ សមត្ថកិច្ចនគរបាលចរាចរណ៍មូលដ្ឋានបានចុះមកធ្វើការពិនិត្យនិងវាស់វែងដល់កន្លែងកើតហេតុ ដោយភាគីទាំងសងខាង បានយល់ព្រមសម្របសម្រួលគ្នា ផ្តល់ជាសំណង ដើម្បីបញ្ចប់រឿងនៅនឹងកន្លែងកើតហេតុតែម្តង៕