កណ្តាល: នៅព្រឹកថ្ងៃទី១៣ ខែតុលា ឆ្នាំ២០១៦ កម្លាំងការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តកណ្តាល បានបញ្ជូនជនសង្ស័យពាក់ពន្ធ័ករណីគ្រឿងញៀន មកកាន់សាលាដំបូងខេត្តកណ្តាល ដើម្បីធ្វើការវិនិច្ឆយ័ទោស។

បើតាមមន្ត្រីប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តកណ្តាល បានប្រាប់ឲ្យដឹងថា ជនសង្សយ័ទាំង០៥នាក់ គឺមានជនសង្ស័យ០៤នាក់ បានត្រូវចៅក្រមស៊ើបសួរសាលាដំបូងខេត្តកណ្តាល លោក អ៊ី សុវណ្ណ និងលោក សាយ សម្ភស្សសេរី ចេញដីការបង្គាប់ឲ្យឃុំខ្លួនបណ្តោះអាសន្ន ពីបទជួញដូរដោយខុសច្បាប់នូវសារធាតុញៀន តាមបញ្ញាត្តិមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន ទី១មានឈ្មោះ ងន ភារម្យ (ហៅ ហេវ) ភេទប្រុស អាយុ២៣ឆ្នាំ ជនជាតិខ្មែរ ទីលំនៅភូមិ ជ្រៃធំ ឃុំសំពៅពូន ស្រុកកោះធំ ខេត្តកណ្ដាល មុខរបរមិនពិតប្រាកដ។ ទី២ឈ្មោះ វ៉ យ៉ាំត្រាវ ភេទប្រុស អាយុ៣៣ឆ្នាំ ជនជាតិវៀតណាម មានទីលំនៅភូមិ លេខ៣ ឃុំខាន់បិន ស្រុកអាងភូ ខេត្តអាងយ៉ាង (ប្រទេសវៀតណាម) មុខរបរ មិនពិតប្រាកដ និងទី៣ឈ្មោះ ប៉េង រតនា (ហៅ គូក) ភេទប្រុស អាយុ ២៧ ឆ្នាំ ជនជាតិខ្មែរ ទីលំនៅភូមិ ទួលស្វាយ ឃុំ ឈើខ្មៅ ស្រុកកោះធំ ខេត្តកណ្ដាល មុខរបរជាងដែក អ្នកទាំង០៣នាក់ បានប្រព្រឹត្តកាលពីថ្ងៃទី ១០ ខែតុលា ឆ្នាំ២០១៦ វេលាម៉ោង១៦និង១០នាទី នៅចំណុចភូមិកំពង់ថ្កុល ឃុំសំពៅពូន ស្រុកកោះធំ ខេត្តកណ្តាល ។ ចំណែកឯឈ្មោះ ជ្រិង ចិន្តា ភេទប្រុស អាយុ២៤ឆ្នាំ មានទីលំនៅភូមិរការកោង ឃុំរការកោង ស្រុកមុខកំពូល ខេត្តកណ្តាល ពីបទជួញដូរដោយខុសច្បាប់នូវសារធាតុញៀន តាមបញ្ញាត្តិមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន ដែលបានប្រព្រឹត្តទៅកាលពីថ្ងៃទី១១ ខែតុលា ឆ្នាំ២០១៦ នៅចំណុចភូមិរការកោង ឃុំរការកោង ស្រុកមុខកំពូល ខេត្តកណ្តាល។ រីឯជនសង្សយ័ម្នាក់ទៀតត្រូវបានចៅក្រមស៊ើបសួរលោក គឹម ម៉េង សម្រេចចេញដីកាឃុំខ្លួនពីបទ រក្សាទុកដោយខុសច្បាប់នូវសារធាតុញៀន តាមបញ្ញាត្តិមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន គឺឈ្មោះ ជីម យ៉ាំងជក់ ភេទប្រុស អាយុ៤៩ឆ្នាំ ជនជាតិវៀតណាម បច្ចប្បន្នស្នាក់នៅផ្ទះជួល ភូមិដើមមាន សង្កាត់ដើមមៀន ក្រុងតាខ្មៅ ខេត្តកណ្ដាល មុខរបរលក់ទិញ អេតចាយ ដែលបានប្រព្រឹត្តឡើងកាលពីថ្ងៃទី១១ ខែតុលា ២០១៦ ឆ្នាំ២០១៦ វេលាម៉ោង៧និង៥០នាទី នៅចំណុចតាមបណ្តោយ ផ្លូវជាតិលេខ២ មុខច្រកចូលផ្ទះសំណាក់រីករាយ ស្ថិតនៅក្នុងភូមិដើមគ សង្កាត់ដើមមៀន ក្រុងតាខ្មៅ ខេត្តកណ្តាល៕