សៀមរាបៈ តាមសេចក្តីរាយការណ៍ពីភូមិសាស្ត្រ «ដែនជម្រកសត្វព្រៃបឹងពែរ» ស្ថិតក្នុងឃុំខ្វាវស្រុកជីក្រែង បានឲ្យដឹងថា សព្វថ្ងៃតំបន់នេះ ដែលគ្រប់គ្រងដោយក្រសួងបរិស្ថាន កំពុងទទួលរងនូវការកាប់បំផ្លាញព្រៃឈើ យ៉ាងរង្គាលពីសំណាក់ក្រុមឈ្មួញ ។ ចំណែកមន្ត្រីបរិស្ថានដែលមានស្នាក់ការប្រចាំនៅតំបន់នោះ មិនបង្ក្រាប ឬទប់ស្កាត់នោះឡើយ។

ប្រភពបានឲ្យដឹងថា មន្ត្រីបរិស្ថាននៅតំបន់ ដែនជម្រកសត្វព្រៃបឹងពែរ ជាអ្នកបើកដៃឲ្យក្រុមឈ្មួញធ្វើសកម្មភាព អារកាប់បំផ្លាញព្រៃឈើ និងដឹកជញ្ជូនឈើទាំងយប់ទាំងថ្ងៃ ជាថ្នូរទៅ និងផលប្រយោជន៍ផ្ទាល់ខ្លួន។ ប្រភពដដែលបន្ថែមថា ព្រៃឈើនៅក្នុងដែនជម្រកសត្វព្រៃបឹងពែរ មានឈើបេង នាងនួន ធ្នង់ គគីរ និងឈើទាល បានរងវិនាសកម្មមហន្តរាយយ៉ាងធ្ងន់ធ្ងរ ដោយក្រុមឈ្មួញប្រើប្រាស់ម៉ាស៊ីនត្រង់ស៊ីន័រ ជាច្រើនគ្រឿង អារផ្ដួល រំលំ រួមធ្វើការដឹកជញ្ជូនតាមគោយន្តកន្ត្រៃរាប់សិបគ្រឿង យកទៅដាក់តាមរោងសិប្បកម្ម នានា នៅតំបន់ខាងលើនេះ ដើម្បីកែច្នៃជាគ្រឿងសង្ហារិមផ្សេងៗ។

មតិមហាជន បានអះអាងបន្ថែមថា មន្ត្រីបរិស្ថាននៅស្នាក់ការដែនជម្រកសត្វព្រៃបឹងពែរ ដើម្បីការពារព្រៃឈើមិនបានចូលរួមទប់ស្កាត់នូវបទល្មើសដែលកើតពេញបន្ទុកក្នុងដែនគ្រប់គ្រងរបស់ខ្លួននោះឡើយ ដោយមន្ត្រីបរិស្ថានទាំងនោះចង់អង្រឹងដេក ចាំប្រមូលលុយពីក្រុមឈ្មួញប៉ុណ្ណោះ។

ពាក់ព័ន្ធនឹងករណីនេះដែរ លោក គង់ សុធា ប្រធានស្នាក់ការដែនជម្រកសត្វព្រៃបឹងពែរ ឃុំខ្វាវ ស្រុកជីក្រែង មិនអាចសុំការបំភ្លឺបានទេ នៅព្រឹកថ្ងៃទី១៣ ខែតុលានេះ។

ករណីនេះ រដ្ឋមន្ត្រីក្រសួងបរិស្ថានគួរតែចាត់វិធានការជាបន្ទាន់ផង បើពុំដូច្នោះទេ ព្រៃឈើនៅតំបន់ខាងលើ និងក្លាយជាវាលរហោឋានក្នុងឆាប់ៗខាងមុខនេះ ជាក់ជាមិនខាន៕