ភ្នំពេញៈ បន្ទាប់ពីមានករណីគ្រោះថ្នាក់ចរាចរណ៍បណ្ដាលឲ្យកម្មករប្រមាណ២៥នាក់ ត្រូវរងរបួសធ្ងន់ស្រាល នៅស្រុកព្រៃនប់ ខេត្តព្រះសីហនុ ក្រសួងការងារ និងបណ្ដុះបណ្ដាលវិជ្ជាជីវៈ បានសម្ដែងក្ដីសោកស្ដាយ និងបញ្ជូនមន្ត្រីបេឡាជាតិរបស់សន្តិសុខសង្គម ទៅចាត់ចែងទទួលខុសត្រូវលើរាល់ការចំណាយចំពោះការព្យាបាលរបស់កម្មកររងគ្រោះ។ នេះបើតាមសេចក្ដីប្រកាសព័ត៌មានរបស់ក្រសួងការងារ នៅថ្ងៃទី១៣ ខែតុលា ឆ្នាំ២០១៦។

សេចក្ដីប្រកាសព័ត៌មានរបស់ក្រសួងការងារ ឲ្យដឹងថា អ្នករងរបួសទាំងអស់បានទទួលការជួយសង្គ្រោះពីសំណាក់អាជ្ញាធរមានសមត្ថកិច្ច និងមន្ត្រីបេឡាជាតិរបបសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ ដោយយកចិត្តទុកដាក់។ គិតត្រឹមម៉ោង១០ព្រឹក ថ្ងៃទី១៣ ខែតុលានេះ មានកម្មករនិយោជិតចំនួន១៨នាក់ បាន និងកំពុងសម្រាកព្យាបាលនៅគ្លីនិក ផូផានី នៅគ្លិនិក វណ្ឌី វាលរេញ ចំនួន៥នាក់ និងសម្រាកព្យាបាលនៅមន្ទីរពេទ្យតេសេ ខេត្តព្រះសីហនុ ចំនួន២នាក់។

គួរជម្រាបថា កម្មករចំនួន២៥នាក់ បានរងរបួសធ្ងន់ស្រាល បន្ទាប់ពីហេតុការណ៍រថយន្តម៉ាក ហុងដា ស៊ីអរវី ពណ៌ទឹកប៊ិច ពាក់ស្លាកលេខ ភ្នំពេញ 2B-6692 បើកបរដោយឈ្មោះ Low kok Beng ភេទប្រុស អាយុ២៦ឆ្នាំ ជនជាតិម៉ាឡេស៊ី ទីលំនៅរាជធានីភ្នំពេញ បើកក្នុងទិសដៅពីព្រះសីហនុ ទៅភ្នំពេញ បានរេចង្កូតចូលផ្លូវម្ខាងទៀត ទៅបុករថយន្តម៉ាក សាំយ៉ុង ពណ៌ទឹកប្រាក់ ពាក់ស្លាកលេខ ព្រះសីហនុ 2A-5863 ដឹកកម្មកររោងចក្រ បណ្តាលឲ្យរថយន្តសាំយ៉ុងក្រឡាប់ជាច្រើនត្រលប់ ហោះចូលក្នុងព្រៃក្បែរដងផ្លូវជាតិ។

ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង៦៖៣០នាទី ព្រឹកថ្ងៃទី១៣ ខែតុលា ឆ្នាំ២០១៦ នៅលើកំណាត់ផ្លូវជាតិលេខ៤ ត្រង់ចំណុចចន្លោះគីឡូម៉ែត្រលេខ១៩៣-១៩៤ ស្ថិតក្នុងភូមិអូរតាប៉ោង ឃុំអូរចំណារ ស្រុកព្រៃនប់ ខេត្តព្រះសីហនុ បណ្ដាលឲ្យកម្មករ៣នាក់ របួសធ្ងន់ និង២២នាក់ រងរបួសស្រាល។ ក្រោយកើតហេតុ ជនរងគ្រោះត្រូវបានបញ្ជូនទៅសង្គ្រោះភ្លាមៗ ដោយឡែកជនជាតិម៉ាឡេស៊ី ជាអ្នកបើកបររថយន្តបង្ក ត្រូវសមត្ថកិច្ចឃាត់ខ្លួនដើម្បីសួរនាំ រីឯរថយន្តទាំងពីរគ្រឿង ត្រូវសមត្ថកិច្ចធ្វើការវាស់វែង រួចយកមករក្សាទុកនៅអធិការដ្ឋាននគរបាលស្រុកព្រៃនប់ ដើម្បីរង់ចាំធ្វើការដោះស្រាយតាមច្បាប់៕