បន្ទាយមានជ័យៈ ថ្លែងប្រាប់ Post News លោក ឡុង ពុន អភិបាលស្រុកមង្គលបុរីបានប្រាប់ដឹងថា មកដល់ថ្ងៃទី១៤ ខែតុលា ឆ្នាំ២០១៦នេះ ឃុំចំនួន៤ នៃស្រុកមង្គលបុរី គឺឃុំសឿ ឃុំចំណោម ឃុំរហាត់ទឹក និងឃុំបត់ត្រង់ កំពុងប្រឈមរងនូវការជន់លិច ដោយជំនន់ទឹកភ្លៀង និងអាចជន់លិច បើសិនភ្លៀងនៅតែបន្តធ្លាក់ ខណៈដែលខេត្តបន្ទាយមានជ័យទទួលរងនៅសំពាធទាប មានភ្លៀងធ្លាក់ជាប់ៗគ្នាក្នុងរយៈពេល៣ទៅ៤ថ្ងៃចុងក្រោយនេះ ក៏ប៉ុន្តែស្ថានភាពទឹកមិនទាន់ដល់កម្រិតប្រកាសអាសន្ននៅឡើយនោះទេ គ្រាដែលនៅសល់តែប៉ុន្មានថ្ងៃខាងមុខទៀតប៉ុណ្ណោះ អាកាសធាតុរងសំពាធទាប និងផុតកំណត់ បន្ទាប់ពីក្រសួងធនធានទឹកនិងឧតុនិយមបានប្រកាសឱ្យដឹងថា ប្រទេសកម្ពុជា ក៏ដូចជាខេត្តបន្ទាយមានជ័យរងសំពាតទាប ចាប់ពីថ្ងៃ១២ ដល់ថ្ងៃទី១៦ខែតុលា ឆ្នាំ២០១៦។

លោកអភិបាលបានបន្តថា នៅស្រុកមង្គលបុរី ផ្លូវលំ១ខ្សែចេញពីឃុំចំណោម ចំណុចទ្វារទឹកដើមពោធិ៍៣ដើមដល់ភូមិសាយសាម៉ន ត្រូវបានទឹកជំនន់ហូរកាត់ផ្តាច់ជាច្រើនកន្លែង បង្កឱ្យមានការលំបាកដល់ការធ្វើដំណើររបស់ប្រជាពលរដ្ឋ។ ការជន់លិចនោះមិនទាន់មានសេចក្តីរាយការណ៍លិចលំនៅដ្ឋានប្រជាពលរដ្ឋនៅឡើយទេ។

លោក ឡុង ពុន អភិបាលស្រុកមង្គលបុរីក៏បានប្រាប់ឱ្យដឹងដែរថា ស្រុកមង្គលបុរី មកដល់ពេលនេះមិនទាន់មានការជន់លិចទឹកជំនន់ធ្ងន់នោះទេ ទន្ទឹមដែលការបង្កបង្កើនផលស្រូវនៅស្រុកមង្គលបុរី មានទិន្នផលកើនឡើងសម្រាប់ឆ្នាំនេះ។ ដំណាំស្រូវមួយចំនួនរងការជន់លិច ប៉ុន្តែគ្រាន់តែរងផលប៉ះពាល់ប៉ុណ្ណោះ ដំណាំស្រូវដែលលិចលង់អាចរងការខូចខាត បើសិនភ្លៀងនៅតែបន្តធ្លាក់ទៀត។ ចំនួនផ្ទៃដីដំណាំស្រូវ ដែលលិចលង់មិនទាន់ដឹងចំនួនពិតប្រាកដនៅឡើយដោយរង់ចាំមន្រ្តីមូលដ្ឋានចុះស្រាវជ្រាវសិន។

ពាក់ព័ន្ធនឹងបញ្ហាទឹកជំនន់នេះដែរ សេចក្តីរាយការណ៍ឱ្យដឹងថា នៅស្រុកព្រះនេត្រព្រះ ស្ថិតក្នុងឃុំទឹកជោរ និងឃុំប្រាសាទ ក៏មានការជន់លិច ដោយទឹកភ្លៀងផងដែរ ក្នុងនោះសាលារៀន មណ្ឌលសុខភាព ផ្លូវលំ និងដំណាំស្រូវ មួយចំនួនក៏រងការជន់លិចផងដែរ តែមិនមានការប៉ះពាល់ដល់ការបើកបវេសនកាលទេ។

ដោយឡែកនៅក្រុងប៉ោយប៉ែតជាប់និងប្រទេសថៃ លោក ង៉ោ ម៉េងជ្រួន អភិបាលក្រុងប៉ោយប៉ែតប្រាប់ឱ្យដឹងថា ក្រុងប៉ោយប៉ែត មកដល់ថ្ងៃទី១៤ ខែតុលា ឆ្នាំ២០១៦ មិនទាន់មានបញ្ហាទឹកជំនន់អ្វីឡើយ អាជ្ញាធរក្រុងប៉ោយប៉ែតតែងតែទំនាក់ទំនងជាមួយនិងគណៈកម្មាធិការគ្រោះមហន្តរាយរបស់ថៃ ដោយគេមិនទាន់ជូនដំណឹងពីភាពប្រកាសអាសន្នបញ្ហាទឹកជំនន់ដល់ភាគីកម្ពុជាយើងនៅឡើយ។ អាជ្ញាធរក្រុងកំពុងតាមដានស្ថានភាពទឹកជំនន់នៅក្នុងប្រទេសថៃជាប្រចាំ។

សូមបញ្ជាក់ថា ខេត្តបន្ទាយមានជ័យត្រូវគេមើលឃើញថា ស្ថានភាពរងគ្រោះដោយទឹកជំនន់កន្លងមក គឺផ្តើមពីការជន់លិចទឹកពីប្រទេសថៃធ្លាក់មក ខេត្តបន្ទាយមានជ័យ ដែលជាខេត្តជាប់ព្រំដែនកម្ពុជា-ថៃ៕