ភ្នំពេញ: នៅព្រឹកថ្ងៃទី១៤ ខែតុលា ឆ្នាំ២០១៦ ឆ្នាំ២០១៦នេះ លោក ម៉ុង មុនីសោភា ចៅក្រមជំនុំជម្រះសាលាដំបូងរាជធានីភ្នំពេញ បានលើកយកសំណុំរឿងហិង្សាទណ្ឌិត វាយគ្នានៅក្នុងពន្ធនាគាររាជធានីភ្នំពេញ PJ មកបើកសវនាការជាសាធារណ:។

ជនជាប់ចោទមានឈ្មោះ ម៉ុន សុខា ភេទប្រុស (កំពុងអនុវត្តទោសរឿង សមគំនិតក្នុងអំពើមនុស្សឃាត រយ:ពេល១៨ឆ្នាំ) ត្រូវបានលោក សេង ហៀង តំណាងអយ្យការចោទប្រកាន់មួយបទចោទទៀត គឺបទហិង្សាដោយចេតនាមានស្ថានទម្ងន់ទោស ប្រព្រឹត្តនៅក្នុងពន្ធនាគាររាជធានីភ្នំពេញ PJ កាលពីថ្ងៃទី៣ ខែកម្ភ: ឆ្នាំ២០១៦ យោងតាមមាត្រា ២១៨នៃក្រមព្រហ្មទណ្ឌ។

ចំណែកជនរងគ្រោះមានឈ្មោះ បាន គ្រាក់ ភេទប្រុស (កំពុងអនុវត្តទោសរឿងលួច) ត្រូវបានជនជាប់ចោទវាយនឹងឆ្នាំងដាំបាយ បែកក្បាលដេរ១៨ថ្នេរ។

នៅក្នុងសវនាការ ជនជាប់ចោទបានសារភាពថា ខ្លួនគេពិតជាបានវាយទៅលើជនរងគ្រោះប្រាកដមែន ព្រោះខឹងជនរងគ្រោះប្រើពាក្យឌឺដងលើរូបគេ ពេលដែលជនរងគ្រោះសុំខ្ចីលុយខ្លួនមិនបាន។

ជនរងគ្រោះជាដើមបណ្តឹងឈ្មោះ បាន គ្រាក់ បានរៀបរាប់ថា នៅថ្ងៃកើតហេតុ ខ្លួន និងជនជាប់ចោទ មានរឿងរួចម្តងនៅពេលថ្ងៃ តែបាសម្រួលគ្នាចប់ លុះដល់ល្ងាចបន្តិចស្រាប់តែជនជាប់ចោទ យកឆ្នាំបាយទៅលបវាយខ្លួននៅក្នងបន្ទប់ទឹក បែកក្បាល ១៨ថ្នេរ។ ជនរងគ្រោះបាន ទាមទារសំណងជំងឺចិត្ត ចំនួន១០០០$ ពីជនជាប់ចោទ។

សំណុំរឿងនេះតុលាការនឹងធ្វើការប្រកាសសាលក្រមនៅព្រឹកថ្ងៃទី២៦ ខែតុលា ឆ្នាំ២០១៦ខាងមុខ៕

//youtu.be/j5-PJORLqMc