កំពត: មុខសញ្ញាប្រើប្រាស់ និង ចែកចាយគ្រឿងញៀនចំនួន៧នាក់ ត្រូវបានកម្លាំងនគរបាលការិយាល័យកណ្តាល ប្រឆាំងបទល្មើសខេត្តកំពត ដឹកនាំដោយលោកឧត្តមសេនីយ៍ត្រី អ៊ិន ជីវ៉ា ស្នងការរង សហការជាមួយកម្លាំងនគរបាលក្រុងកំពត ចុះទៅបង្ក្រាប និងឃាត់ខ្លួនជាបន្ដបន្ទាប់។

ប្រតិបត្តិការនេះ បានធ្វើឡើងពីរទីតាំងផ្សេងគ្នា បង្ក្រាបករណីទី១ ឃាត់ខ្លួនជនសង្ស័យ៤នាក់ នៅម៉ោង១២និង១៥នាទីថ្ងៃទី១៤ ខែតុលា ឆ្នាំ២០១៦ ចំណុចភូមិកំពុងបាយខាងត្បូង សង្កាត់កំពុងបាយ ក្រុងកំពត ខេត្តកំពត និងករណីទី២ ត្រូវបានកម្លាំងអធិការនគរបាលស្រុកកំពុងត្រាច ចុះបង្ក្រាបឃាត់បានជនសង្ស័យ៣នាក់ នៅវេលាម៉ោង៧និង៣៥នាទីយប់ថ្ងៃទី១៣ ខែតុលា ឆ្នាំ២០១៦ ចំណុចអ្នកតាចិន ភូមិកំពុងត្រាចទី១ ឃុំកំពុងត្រាចកើត ស្រុកកំពុងត្រាច។

លោកឧត្តមសេនីយ៍ត្រី អ៊ិន ជីវ៉ា ស្នងការរង និងជាប្រធាន ការិយាល័យកណ្តាល ប្រឆាំងបទល្មើស នៃស្នងការដ្ឋាននគរបាលខេត្តកំពត បានឲ្យដឹងថា ជនសង្ស័យដែលសមត្ថកិច្ចឃាត់ខ្លួនបាន រយ:ពេល២ថ្ងៃ នៅក្នុងក្រុងកំពត និង ស្រុកកំពុងត្រាច ចំនួន៧នាក់ ក្នុងមានស្រីចំនួន២នាក់ ទី១ ឈ្មោះ លាម រ៉ាដា ភេទប្រុស អាយុ២១ឆ្នាំ មានទីលំនៅភូមិកំពុងបាយខាងត្បូង សង្កាត់កំពុងបាយ ក្រុងកំពត ខេត្តកំពត ជាមុខសញ្ញាចាស់ចែកចាយគ្រឿងញៀនដ៏សកម្មម្នាក់ ២. ឈ្មោះ គី សុមាត្រា (ហៅត្រា) ភេទប្រុស អាយុ ២១ឆ្នាំ នៅភូមិកំពង់បាយខាងត្បូង សង្កាត់កំពុងបាយ ៣. ឈ្មោះ លី សុខា (ហៅស្រីកា) ភេទស្រី អាយុ ១៩ឆ្នាំ នៅភូមិ-សង្កាត់បឹងសាឡាង ខណ្ឌទួលគោក រាជធានីភ្នំពេញ ៤. ឈ្មោះ ស ស្រីដា ភេទស្រី អាយុ ២៩ឆ្នាំ នៅភូមិជើងព្រៃ ស្រុកព្រៃឈរ ខេត្តកំពង់ចាម និង ជនសង្ស័យទាំង៣នាក់ ជាអ្នកប្រើប្រាស់គ្រឿងញៀន នៅក្នុងស្រុកកំពុងត្រាច។

ចំណែកវត្ថុតាងដែលសមត្ថកិច្ចរឹបអូសបានទាំងអស់រួមមាន ៖ ក្នុងក្រុងកំពតថ្នាំញៀន ប្រភេទម៉ាទឹកកក ចំនួន០៦កញ្ចប់ (៥កញ្ចប់ធំ និង១កញ្ចប់តូច) ទម្ងន់២១,៣១ក្រាម ទូរស័ព្ទដៃចំនួនពីរគ្រឿង និង ស្រុកកំពុងត្រាច ថ្នាំញៀនប្រភេទម៉ាទឹកកក ចំនួន០៤កញ្ចប់តូច ទូរស័ព្ទដៃចំនួនមួយគ្រឿង។

បច្ចុប្បន្នជនសង្ស័យខាងលើ ត្រូវបានការិយាល័យជំនាញនៃស្នងការដ្ឋានខេត្ត កំពុងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី៕