មណ្ឌលគិរីៈ ឈើជាច្រើនដុំទៀតហើយ ដែលគេគរទុកចោលនៅលើដីរបស់ប្រជាពលរដ្ឋ នៅក្បែរផ្លូវទៅច្រកទ្វារឡាប៉ាខេ នៅចំណុចជញ្ជីងទី១ ស្ថិតនៅក្នុងភូមិឡាប៉ាខេ ឃុំស្រែខ្ទុម ស្រុកកែវសីមា ត្រូវបានសមត្ថកិច្ច និងជំនាញ រឹបអូសយកមករក្សាទុកនៅផ្នែករដ្ឋបាលព្រៃឈើរស្រុកកែវសីមា។

បើតាមប្រជាពលរដ្ឋរស់នៅម្តុំនោះ បានឲ្យដឹងថា ពួកឈ្មួញនៅក្នុងស្រុកនេះ នៅតែធ្វើសកម្មភាពលួចដឹកជញ្ជូនឈើ ទោះបីសមត្ថកិច្ច និងជំនាញចុះបង្ក្រាបបានជាបន្តបន្ទាប់ នាពេលកន្លងមកយ៉ាងណាក៏ដោយ។ ជាក់ស្ដែងឈើ ដែលក្រុមឈ្មួញ បានដឹកយកមកគរទុកចោលនោះ គឺសម្រាប់លួចដឹកជញ្ជូនយកទៅលក់ឲ្យឈ្មួញវៀតណាម ប៉ុន្តែត្រូវបានជំនាញផ្នែករដ្ឋបាលព្រៃឈើស្រុកកែវសីមា សហការណ៍ជាមួយនគរបាលអធិការស្រុក ចុះរឹបអូសកាលពីព្រឹកថ្ងៃទី១៤ ខែតុលា ឆ្នាំ២០១៦នេះ។

ប្រជាពលរដ្ឋ បានបន្តថា រយៈពេលមួយខែនេះ ការចុះបង្ក្រាបរបស់ជំនាញសមត្ថកិច្ច និងកងរាជអាវុធហត្ថលើផ្ទៃប្រទេស បានទាំងរថយន្តដឹកឈើ ព្រមទាំងជនសង្ស័យបញ្ជូនមកសាលាដំបូងខេត្តធ្វើឲ្យក្រុមឈ្មួញមួយចំនួនខ្លាចរអា ប៉ុន្តែក៏នៅមានក្រុមឈ្មួញមួយចំនួនតូចនៅតែហ៊ានលួចធ្វើសកម្មភាព។ ពលរដ្ឋបានបន្តទៀតថា បើចង់រកមុខក្រុមឈ្មួញនេះ ត្រូវរកម្ចាស់ផ្ទះមកសួរនាំនឹងដឹង ហើយឈើរបស់អ្នកណានោះ។

លោក ជុយ សុខឃាង នាយផ្នែករដ្ឋបាលព្រៃឈើស្រុកកែវសីមា បានឲ្យដឹងថា ក្នុងប្រតិបត្តិការត្រួតពិនិត្យ នឹងឆែកឆេរនៅលើដីខាងលើនេះ កំលាំងរបស់លោករឹបអូសបានឈើចំនួន២០ដុំ ប្រភេទឈើសុក្រំ បើគិតជាម៉ែត្រគូបមិនទាន់ដឹងនៅឡើយទេ ពីព្រោះមិនទាន់ធ្វើការវាស់វែង។

លោកបានបន្តថា ក្នុងប្រតិបត្តិការ ឆែកឆេរនឹងរឹបអូសខាងលើនេះ គឺធ្វើឡើងដោយមានការអនុញ្ញាត នឹងបញ្ជាផ្ទាល់ពីលោក សូ សុវិជ្ជា ព្រះរាជអាជ្ញារងអមសាលាដំបូងខេត្តមណ្ឌលគិរី ឲ្យចុះប្រមូលយកវត្ថុតាងទាំងអស់យកទៅរក្សារទុកនូវផ្នែករដ្ឋបាលព្រៃឈើស្រុកកែវសីមា នឹងស៊ើបសួររកម្ចាស់ ដើម្បីចាត់ការទៅតាមនីតិវិធីច្បាប់៕