ព្រៃវែងៈ បុរសម្នាក់ត្រូវគេសម្លាប់នៅកណ្តាលវាលស្រែ គ្រាដែលជនរងគ្រោះចេញពីផ្ទះទៅរកត្រី ហើយករណីនេះគេសន្និដ្ឋានថា ឃាតកប្រើខ្នងពូថៅវាយសំពងចំក្បាលជនរងគ្រោះ។

តាមការបញ្ជាក់ពីសមត្ថកិច្ច ស្រុកស៊ីធរកណ្តាល បានប្រាប់ភ្នាក់ងារ Post News ឱ្យដឹងថា សាកសពបុរសរងគ្រោះ ត្រូវបានស្ត្រីជាប្រពន្ធប្រទះឃើញស្លាប់នៅចំណុចវាលស្រែចម្ងាយពីភូមិ ប្រហែលជា១២០០ម៉ែត្រ ស្ថិតនៅភូមិដើមទួល ស្រុកស៊ីធរកណ្ដាល ខេត្តព្រៃវែង កាលពីវេលាម៉ោង៥ទៀបភ្លឺថ្ងៃទី១៥ ខែតុលា ឆ្នាំ២០១៦នេះ បន្ទាប់ពីមិនឃើញប្តីវិលពីរកត្រីមកផ្ទះវិញ។

មន្ត្រីនគរបាលស្រុកស៊ីធរកណ្តាលបានឱ្យដឹងទៀតថា យោងតាមស្ត្រីឈ្មោះ ម៉ៅ ទ្រឿន អាយុ ៤៥ឆ្នាំ ជាប្រពន្ធជនរងគ្រោះប្រាប់ថា ជនរងគ្រោះមានឈ្មោះ ហង់ ផង់ អាយុ៤៦ឆ្នាំ រស់នៅភូមិកើតហេតុខាងលើ។

តាមប្រពន្ធរបស់ជនរងគ្រោះបានប្រាប់ឲ្យដឹងថា នៅមុនពេលកើតហេតុ គឺកាលពីវេលាម៉ោង៩យប់ ថ្ងៃទី១៤ ខែតុលា ប្ដីរបស់ខ្លួនបានចេញពីផ្ទះម្នាក់ឯងទៅឆ្លុះត្រីនៅឯវាលស្រែ នៅភូមិដើមទួល ស្ថិតនៅឆ្ងាយពីភូមិ ១២០០ម៉ែត្រ ហើយមិនឃើញប្តីត្រឡប់មកផ្ទះវិញសោះ។
លុះព្រឹកឡើងប្រហែលជាម៉ោង៥ភ្លឺថ្ងៃទី១៥ ខែតុលា ខ្លួនក៏បានចេញពីផ្ទះទៅតាមរកប្តី ស្រាប់តែប្រទះឃើញប្តីដេកស្លាប់ នៅចំណុចកើតហេតុខាងលើ ក្នុងស្ថានភាពផ្កាប់មុខ ហើយក៏រត់ទៅរាយការណ៍ដល់សមត្ថកិច្ចភ្លាមៗ។

មន្ត្រីនគរបានស្រុកស៊ីធរកណ្តាលបានបញ្ជាក់ថា បន្ទាប់ពីទទួលបានព័ត៌មាននេះភ្លាម សមត្ថកិច្ចបានចុះទៅដល់ទីតាំងកើតហេតុពិនិត្យជំហានដំបូង រួចយកសាកសពមកពិនិត្យនៅផ្ទះជនរងគ្រោះបន្តទៀត។

យោងតាមការពិនិត្យពីសមត្ថកិច្ចនគរបាលបច្ចេកទេសវិទ្យាសាស្ត្រនៃស្នងការខេត្ត និងនគរបាលព្រហ្មទណ្ឌខេត្ត សហការជាមួយកម្លាំងកងរាជអាវុធហត្ថខេត្ត បានប្រាប់ថា ការស្លាប់របស់ជនរងគ្រោះ គឺជាអំពើឃាតកម្ម ព្រោះនៅលើក្បាលសពមានស្នាមវាយផុងលលាដ៍ក្បាល ដែលសន្និដ្ឋានថា ជនមិនស្គាល់មុខវាយនិងខ្នងពូថៅ ឬញញួ។

ក្រោយពីពិនិត្យរួចសមត្ថកិច្ចបានប្រគល់សពជូនគ្រួសារធ្វើបុណ្យតាមប្រពៃណី។ ចំណែកជនសង្ស័យសមត្ថកិច្ចកំពុងកំណត់អត្តសញ្ញាណដើម្បីឈានទៅចាប់ខ្លួនយកមកផ្តន្ទាទោសតាមច្បាប់៕