វិទ្យាស្ថានទឹកនិងដំណាំ នឹងចំណាយថវិកាប្រមាណជាង ១០លានដុល្លារអាមេរិក ដែលនឹងចាប់ផ្តើមសាងសង់នៅឆ្នាំ ២០១៧ ដើម្បីឆ្លើយតបទៅនឹងតម្រូវការអភិវឌ្ឍន៍ ធនធានមនុស្សលើវិស័យទឹក។ នេះបើយោងតាមសេចក្តីប្រកាសរបស់ក្រសួងធនធានទឹក និងឧតុនិយម ដកស្រង់ដោយភ្នាក់ងារសារព័ត៌មានជាតិ កាលពីពេលថ្មីៗនេះ។

គម្រោងស្ថាបនាវិទ្យាស្ថានទឹក និងដំណាំនេះ គ្រោងសាងសង់លើផ្ទៃដី ៦ហិកតា ស្ថិតក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ ក្រោមជំនួយឥតសំណងរបស់រដ្ឋាភិបាលចិន។

ការសម្រេចបង្កើតវិទ្យាស្ថាននេះឡើង ក៏ដោយសារតែកម្ពុជា មានកង្វះខាតធនធានមនុស្សពហុវិស័យ លើជំនាញកសិកម្ម និងការគ្រប់គ្រងទឹក មិនអាចឆ្លើយតបការអភិវឌ្ឍលើវិស័យកសិកម្ម និងធារាសាស្រ្ត។

បច្ចុប្បន្នមន្រ្តីជំនាញចេញពីសាលាកសិកម្ម ចេះតែជំនាញកសិកម្ម ហើយចេញពីវិទ្យាស្ថានបច្ចេកវិទ្យាកម្ពុជា យល់ដឹងតែធារាសាស្រ្ត ដែលជាបញ្ហាពិបាកប្រមូលផ្តុំគ្នា និងប្រើកម្លាំងច្រើនក្នុងការដំណើរអភិវឌ្ឍន៍គម្រោងនីមួយៗ។ នេះបើតាមប្រសាសន៍របស់លោក ចាន់ យុត្ថា នាយកខុទ្ទកាល័យ និងជាអ្នកនាំពាក្យក្រសួងធនធានទឹក និងឧតុនិយម។

គួរបញ្ជាក់ថា សម្រាប់គម្រោងស្ថាបនាវិទ្យាស្ថាននេះ រដ្ឋាភិបាលចិនជាអ្នកផ្តល់សំណង់អគារ និងសម្ភារៈសិក្សា ខណៈរដ្ឋាភិបាលបារាំង ជាអ្នកផ្តល់ជំនាញបច្ចេកទេស កម្មវិធីសិក្សា និងការបញ្ជូនសាស្រ្តចារ្យមកបង្រៀននៅវិទ្យាស្ថាននេះ៕