ភ្នំពេញ: បើតាមសមត្ថកិច្ច បានឲ្យដឹងថា បុរសពីរនាក់ ត្រូវបានឃាត់ខ្លួន បន្ទាប់ពួកគេប្រើអំពើហិង្សារទៅលើមន្ត្រីនគរបាលខណ្ឌច្បារអំពៅ នៅចំណុចតារាងបាល់ទាត់បុរីលុច្សសារី ផ្លូវជាតិលេខ១ ភូមិឬស្សីស្រស់ សង្កាត់និរោធ ខណ្ឌច្បារអំពៅ។

ប្រភពពីមន្ត្រីប៉ូលិស បាននិយាយថា ជនរងគ្រោះឈ្មោះ ផាន់ ដារ៉ា ភេទប្រុស អាយុ ៣២ឆ្នាំ ជនជាតិខ្មែរ មុខរបរ នគរបាល ស្នាក់នៅ ផ្ទះលេខ៩៩ ផ្លូវ៣៥៥ ភូមិដើមអំពិល សង្កាត់ ច្បារអំពៅទី១ ខណ្ឌច្បារអំពៅ។ ចំណែកជសង្ស័យទាំងពីរ ទី១ ឈ្មោះ ឌុច ចាន់មករា ភេទប្រុស អាយុ៣២ឆ្នាំ ជនជាតិខ្មែរ មុខរបរ បើកបររថយន្ត ស្នាក់នៅភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ។ ទី២ ឈ្មោះ ឌុច ចាន់លីដា ភេទប្រុស អាយុ២៥ឆ្នាំ ជនជាតិខ្មែរ មុខរបរគ្មាន ស្នាក់នៅភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ ។

ហេតុការណ៍នេះ បានកើតទ្បើងនៅថ្ងៃទី១៥ ខែតុលា វេលាម៉ោង១៧ និង២០នាទី ដោយជនរងគ្រោះ និងជនសង្ស័យនាំគ្នាលេងបាល់ទាត់ ពេលជនរងគ្រោះបណ្តើរបាល់ ស្រាប់តែជនសង្ស័យឈ្មោះ ឌុច ចាន់លីដាយកជើងទៅឆ្កឹះបាល់ចេញក៏ប៉ះជើងគ្នា រួចជនសង្ស័យឈ្មោះ ឌុច ចាន់លីដា ក៏ស្ទុះទៅវាយជនរងគ្រោះ មួយដៃចំចញ្ចើមខាងស្តាំ បណ្តាលឲ្យបែកចេញឈាម រួចក៏មានការប្រតាយប្រតប់គ្នាដួលទៅលើដីទាំងអស់គ្នា។

ពេលនោះជនសង្ស័យឈ្មោះ ឌុច ចាន់មករា បានរត់ចូលទៅធាក់ជនរងគ្រោះមួយជើងចំដើម ទ្រូង បណ្តាលឲ្យរយះចេញឈាម រួចក៏ត្រូវបានអ្នកលេងបាល់ផ្សេងទៀតជួយឃាត់បំបែកចេញ បន្ទាប់មក សមត្ថកិច្ចយើងចុះទៅដល់ឃាត់ខ្លួនជនសង្ស័យទាំង២នាក់ បញ្ជូនមកអធិការដ្ឋាន នគរបាលខណ្ឌច្បារ អំពៅ ធ្វើការសាកសួរ ។ ចំណែកជនរងគ្រោះត្រូវបានមិត្តភក្តិនាំទៅព្យាបាល នៅមន្ទីរពេទ្យបង្អែកច្បារអំពៅ។

បច្ចុប្បន្នជនសង្ស័យទាំង២នាក់ ត្រូវសមត្ថកិច្ចឃាត់ខ្លួនបណ្តោះអាសន្ន នៅអធិការដ្ឋាននគរបាលខណ្ឌច្បារអំពៅ ដើម្បីចាត់ការទៅតាមនីតិវិធីច្បាប់ជាបន្តទៅទៀត៕