កំពង់ឆ្នាំង: លោក ចេង ចាន់ដូណា អភិបាលរងស្រុកកំពង់លែង និងជាប្រធានគណ:កម្មការរៀបចំបុណ្យជាតិរបស់ស្រុក បានលើកឡើងថា ការរៀបចំពីធីអុំទូកប្រណាំងរបស់អាជ្ញាធរស្រុកនៅក្នុងថ្ងៃនេះ គឺដើម្បីថែរក្សាប្រពៃណីរបស់បុព្វបុរសខ្មែរ និងជាទំនៀមទម្លាប់ខ្មែរ ដែលមានតាំងពីបូរាណយូរលង់ណាស់មកហើយកុំឲ្យបាត់បង់។

លោកបានថ្លែងនៅបែបនេះនៅមុខសាលាស្រុកកំពង់លែង នារសៀលថ្ងៃទី១៦ ខែតុលា ឆ្នាំ២០១៦ ក្នុងពេលអាជ្ញាធរស្រុកកំពង់លែង បានរៀបចំពិធីប្រណាំងអុំទូក និងបណ្តែតប្រទីប ក្នុងថ្ងៃបុណ្យចេញព្រះវស្សា និងអបអរថ្ងៃបុណ្យអុំទូក អកអំបុកសំពះព្រះខែ ដោយមានការចូលរួមសំណាក់មន្ត្រីរាជការជុំវិញស្រុក និងប្រជាពលរដ្ឋមកពីគ្រប់មូលដ្ឋានក្នុងស្រុក ចូលរួមលេងកម្សាន្ត និងទស្សនាយ៉ាងច្រើនកុះករ។

លោកបានបន្តទៀតថា នៅក្នុងឯកសារ និងនៅក្នុងសិលាចារឹកលើផ្ទៃជញ្ជាំងអង្គរវត្តរបស់ខ្មែរ បានបញ្ជាក់ថា បុព្វបុរសខ្មែរសម័យបូរាណបានអុំ ទូកធ្វើចម្បាំងយ៉ាងអង់អាចក្លាហានជាមួយពួកឈ្វា ការពារទឹកដីអង្គរបានគង់រង្សរហូតរៀងមក។ ដោយឡែកការបណ្តែតប្រទីបនៅក្នុងថ្ងៃបុណ្យចេញព្រះវស្សានេះ ក៏ជាប្រពៃណីពីដូនតាផងដែរ ដែលអ្នកស្រុកបា្ររព្វធ្វើឡើងដោយមានការសែនព្រែន បណ្តែតប្រទីប បណ្តែតនំចំណីតាមទឹកទន្លេរលឹកដល់គុណដូនតា ដែលបានផ្តល់សេចក្តីសុខដល់មនុស្សលោក ឲ្យធ្វើសែ្រចម្ការបានផលដ៏ល្អប្រសើរ ចិញ្ចឹមជិវិត ចិញ្ចឹមកូនចៅ និងសុខចម្រើនរហូតមក។

បើតាមការឲ្យដឹងថារបស់គណ:កម្មការរៀបចំបុណ្យអុំទុក បណ្តែតប្រទីបស្រុកកំពង់លែង បញ្ជាក់ថា កីឡាករដែលចូលរួមអុំទូកប្រណាំងក្នុងថ្ងៃនេះមានចំនួន១០ទូក និងកាណូតបាឡាស្មាច់ចូលរួមប្រណាំងមានចំនួន១០គ្រឿង ដែលមានកីឡាករសរុបប្រមាណ៨០នាក់ ។ ពិធីនេះ ក៏មានកាណូតសមត្ថកិច្ចនគរបាល យោធា និងកងរាជអាវុធហត្ថស្រុកចំនួន៤គ្រឿង ចូលរួមរៀបចំសណ្តាប់ធ្នាប់ និងសន្តិសុខក្នុងពេលប្រកួត មានសុវត្តិភាពល្អ ទន្ទឹមនឹងនោះក៏មានការជួយឧបត្ថជាទឹកសុទ្ធ និងថវិកាមួយចំនួនពីអាជីវករ មន្ត្រីរាជការ និងប្រជាពលរដ្ឋមួយចំនួននៅក្នុងស្រុកផងដែរ។

ដោយឡែកពិធីបណ្តែតបានរៀបចំនៅលើកាណូត៣គ្រឿង ក្នុងនោះ២គ្រឿងរៀបចំដោយគណ:កម្មការវត្តអម្ពវ័ន ហៅវត្តថ្មី និង១គ្រឿងទៀតរៀបចំដោយសាលាស្រុកកំពង់លែង ដែលតុបតែងដោយភ្លើងចម្រុះពណ៌ និងបានធ្វើពិធីដង្ហែនៅពេលយប់ពីមុខសាលាស្រុកកំពង់លែង ទៅកាន់ផ្សារក្រោមក្រុងកំពង់ឆ្នាំង ដោយមានប្រជាពលរដ្ឋ ព្រះសង្ឃ ពុទ្ធបរិស័ទ ឧបាសក ឧបាសិកាចូលរួមដង្ហែជាច្រើននាក់យ៉ាងសប្បាយរីករាយ៕