កណ្តាល: ជនសង្ស័យ ០២នាក់ ដែលជាមុខសញ្ញាទាក់ឆ្កែ និងលួចប្រចាំស្រុកកោះធំ ខេត្ត កណ្តាល ត្រូវបានសមត្ថកិច្ចក្របួចជាប់ ពេលកំពុងរៀបចំទាក់ឆ្កែប្រជាពលរដ្ឋ កាលពីយប់រំលងអាធ្រាតឈានចូលថ្ងៃទី១៧ ខែតុលា។

ជនសង្ស័យទាំង២នាក់នោះ គឺសមត្ថកិច្ចក្របួចបាន កាលពីវេលាម៉ោង ១២ និង៤០នាទីរំលងអាធ្រាត ឈានចូលថ្ងៃទី១៧ ខែតុលា នៅចំណុច ភូមិព្រែកធន់ ឃុំព្រែកថ្មី ស្រុកកោះធំ ខេត្កកណ្ដាល។

ជនសង្ស័យ ទី១- ឈ្មោះ ប៉ូ ផាត ហៅ កញ្ចាស់ ប្រុស អាយុ ៣៥ឆ្នាំ រស់នៅភូមិព្រែកថ្មី ឃុំ ព្រែកថ្មី ស្រុកកោះធំ ខេត្តកណ្តាល មុខរបរមិនពិតប្រាកដ, ទី២- ឈ្មោះ ដូយ ផៃ ប្រុស អាយុ ២២ឆ្នាំ រស់នៅភូមិព្រែកថ្មី ឃុំ ព្រែកថ្មី ស្រុកកោះធំ ខេត្តកណ្ដាល មុខរបរមិនពិតប្រាកដ។
ការឃាត់ខ្លួននោះ សមត្ថកិច្ចក៏បានរឹបអូសវត្ថុតាងរួមមាន ឧបករណ៍សំរាប់ប្រទាក់ឆ្កែចំនួន០១គ្រឿងធ្វើពីដងឬស្សីប្រវែង២០០សង់ទីម៉ែត្រ, ខ្សែគោចងជាប់បណ្តោយដងឬស្សីពីគល់ទៅចុងប្រវែង២០០សង់ទីម៉ែត្រ, ខ្សែហ្រ្វាំងកង់ចងប្រទាក់កងជារង្វង់ប្រទាក់ជាប់នឹងខ្សែគោ រុំជាមួយដងឫស្សី, ម៉ូតូ ០១គ្រឿង ម៉ាកហុងដា C125 ស៊េរីឆ្នាំ ២០០៨ ពណ៌ខ្មៅ បិតស្កុតពណ៌ទឹកប្រាក់ ឡើងតែមស៊េរី២០១៤ ពាក់ស្លាកលេខ ភ្នំពេញ 1AV-0998។

សមត្ថកិច្ចបានឲ្យដឹងទៀតថា នៅថ្ងៃទី១៧ ខែតុលា ឆ្នាំ២០១៦ វេលាម៉ោង១២និង៤០នាទី រំលងអាធ្រាត កម្លាំងអធិការដ្ឋាន នគរបាលស្រុកកោះធំ បានចុះល្បាតក្នុងភូមិសាស្រ្តដែលខ្លួនគ្រប់គ្រង ក៏ប្រទះឃើញសញ្ញាលួចយ៉ាងសកម្មចំនួន២នាក់ឈ្មោះ ប៉ូ ផាត ហៅ កញ្ចាស់ និង ឈ្មោះ ដូយ ផៃ កំពុងជិះម៉ូតូ១គ្រឿង ធ្វើសកម្មភាពប្រើឧបករណ៍ប្រទាក់ឆ្កែ កំពុងរៀបប្រទាក់ឆ្កែនៅចំណុចកើតហេតុខាងលើ ក៏ធ្វើការឃាត់ខ្លួនជនសង្ស័យខាងលើ និងវត្ថុតាងបញ្ជូនមកកាន់មកអធិការដ្ឋាននគរបាលស្រុកដើម្បីសាកសួរ។

យោងតាមចម្លើយសារភាពរបស់ជនសង្ស័យឈ្មោះ ប៉ូ ផាត និង ដូយ ផៃ បានសារភាពថា ខ្លួនពិតជាបានធ្វើសកម្មភាពជិះម៉ូតូ ដើរទាក់ឆ្កែតាមផ្លូវ ប្រាកដមែន ដោយការទាក់នោះគឺទាក់ជាប្រចាំ ព្រមទាំងបានលួចផលដំណាំរបស់អ្នកភូមិឃុំស្រុកកោះធំជាប្រចាំ មិនថាផលដំណាំតូច-ធំ ឬ ខ្ចី-ចាស់ នោះទេគឺលួចទាំងអស់។ បច្ចុប្បន្នជនសង្ស័យទាំង២នាក់ឃាត់ខ្លួននៅអធិការដ្ឋាន ដើម្បីចាត់ការតាមនីតិវិធី៕