កំពង់ឆ្នាំង: យុវជនម្នាក់ តូចចិត្តនឹងឪពុកស្តីឲ្យបន្តិចបន្តួច តូចចិត្តបានយកខ្សែនីឡុង ចងកជាប់នឹងដើមជ្រៃ សម្លាប់ខ្លួនគ្មានអ្នកណាដឹងក្រោយពីបាត់ខ្លួន១យប់១ថ្ងៃមក បង្ករឲ្យមានការភ្ញាក់ផ្អើល កាលពីវេលាម៉ោង២ រសៀលថ្ងៃទី១៧ ខែតុលា ឆ្នាំ២០១៦ ស្ថិតនៅចំណុចដំបូកដើមជ្រៃ កណ្តាលស្រែ ស្ថិតក្នុងភូមិអូរកណ្តោល ឃុំជ្រៃបាក់ ស្រុករលារប្អៀរ ខេត្តកំពង់ឆ្នាំង។

សមត្ថកិច្ចស្រុករលារប្អៀរ បានឲ្យដឹងថា យុវជនធ្វើអត្តឃាតខ្លួនឯងខាងលើនេះមានឈ្មោះ សោម វ៉ុន អាយុ២០ឆ្នាំ មុខរបរធ្វើស្រែ ស្នាក់នៅក្នុងភូមិត្រោកកណ្តាល ឃុំស្រែថ្មី ស្រុករលារប្អៀរ។

បើយោងតាមប្រភពព័ត៌មានពីគ្រួសារជនរងគ្រោះ បានឲ្យដឹងថា នៅមុនថ្ងៃកើតហេតុមួយថ្ងៃ ឪពុកជនរងគ្រោះបានស្តីបន្ទោសឲ្យជនរងគ្រោះបន្តិចបន្តួចជាធម្មតាក្នុងគ្រួសារ តែជនរងគ្រោះហាក់ដូចជាខឹងខ្លាំង ហើយនៅព្រឹកនោះដែរគេបានយកដំបងឈើ មកវ៉ៃម៉ូតូខ្ទេចអស់មួយគ្រឿង។ បន្ទាប់មកជនរងគ្រោះក៏បានដើរចេញពីផ្ទះបាត់មួយថ្ងៃមួយយប់ លុះព្រឹកឡើងទើបមានអ្នកស្រុកប្រទះឃើញជនរងគ្រោះ ស្លាប់ដោយចងកជាប់នឹងដើមជ្រៃកណ្តាលវាលស្រែ ស្លាប់បាត់ទៅហើយ មិនដឹងតាំងពីពេលណាមកនោះទេ។

បន្ទាប់ពីកើតហេតុ ក្រុមគ្រួសារជនរងគ្រោះរួមនឹងសមត្ថកិច្ចបានចុះមកពិនិត្យដោយបានស្រាយខ្សែទម្លាក់សពមកខាងក្រោម និងបានធ្វើកោសល្យវិច័្ចយ តាមច្ចេកទេស បានដឹងថា ជនរងគ្រោះពិតជាបានចងកសម្លាប់ខ្លួនប្រាកដមែន ហើយបច្ចុប្បន្នសាកសពជនរងគ្រោះ ត្រូវបានសមត្ថកិច្ចធ្វើកំណត់ហេតុ ប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕