កំពង់ឆ្នាំង: ក្នុងរយ:ពេលពេញមួយថ្ងៃ សមត្ថកិច្ចផ្នែករដ្ឋបាលជលផលកំពង់ប្រាសាទ បានសហការគ្នាចុះធ្វើការរុះរើបំផ្លាញចោលរបាំងលូស្បៃមុង១៥កន្លែង មានប្រវែង៨០០ម៉ែត្រ លូស្បៃមុង១៥គ្រឿងបង្គោល៣០០ដើម រួមនឹងបានចាក់លែងកូនត្រីចម្រុះចំនួន៨០គីឡូក្រាម ក្នុងនោះរបាំងសាច់ស្បៃមុង៣០កន្លែង កន្លែងប្រវែង១៥០០ម៉ែត្រ លូស្បៃមុង៤០គ្រឿង បង្គោល៨០០ដើម នៅចំណុចឃុំអំពិលទឹកស្រុកកំពង់ត្រឡាច ខេត្តកំពង់ឆ្នាំង ។

ការបង្ក្រាបនេះ បានធ្វើឡើងនៅថ្ងៃទី១៧ ខែតុលា ឆ្នាំ២០១៦ ម្សិលមិញ ដោយមានកម្លាំងផ្នែករដ្ឋបាលជលផលកំពង់ប្រាសាទ និងនគរបាលស្រុកកំពង់ត្រឡាច សរុប១០នាក់ មធ្យោបាយធ្វើសកម្មភាព កាណូតស្មាច់ចំនួន២គ្រឿង ខណ:ដែលក្រុមជនល្មើសលួចដាក់បង្កប់នៅព្រែក បឹងនិងកន្លែងផ្សេងៗ ទៀតដែលសមត្ថកិច្ចពិបាកក្នុងការធ្វើដំណើររុករក ហើយត្រូវបានគេដាក់បន្លំ ភ្នែកសមត្ថកិច្ច ។

លោក នាយផ្នែករដ្ឋបាលជលផល កំពង់ប្រាសាទ ដែលស្ថិតក្នុងការបង្ក្រាប បានឲ្យដឹងថា ការបង្ក្រាបលើកនេះ ធ្វើឡើងពេញមួយថ្ងៃ ចាប់បានឧបករណ៍របាំងស្បៃមុង ផ្នែករដ្ឋបាលជលផលកំពង់ប្រាសាទ សហការគ្នាជាមួយនគរបាលស្រុកធ្វើការរុករកក្នុងបឹង ដែលក្រុមជនល្មើស ធ្វើការដាក់បង្កប់ខាងក្រោមទឹកបន្លំភ្នែកសមត្ថកិច្ច ខណ:ពួកគេ ហាក់ដូចដឹងហេតុការណ៍ជាមុន ។

ប្រភព បានបន្ថែមទៀតថា ការចុះបង្ក្រាបនៅពេលនេះ គឺ ដើម្បីធ្វើការទប់ស្កាត់បង្ក្រាបការដាក់របាំងរាំងស្បៃមុងនៅតាមព្រែក បឹងនិងតំបន់ផ្សេងៗស្ទាក់ចាប់យកកូនត្រីតូច ខណ:ដែលទឹកទន្លេកំពុងមានការស្រកទៅវិញផងដែរ ។

ក្នុងនោះផងដែរ លោកនាយផ្នែករដ្ឋបាលជលផលកំពង់ប្រាសាទ បានឲ្យដឹងទៀតថា ក្នុងនោះសមត្ថកិច្ចជំនាញនៅតែបន្តធ្វើការផ្សព្វផ្សាយអប់រំណែនាំដល់បងប្អូនប្រជាពលរដ្ឋម្តងហើយម្តងទៀត ធ្វើយ៉ាងណាឲ្យយល់ច្បាស់ស្តីពីច្បាប់ជលផល ក្នុងនោះហាមការនេសាទដោយឧបករណ៍នេសាទស្បៃមុង ឆក់ និងឧបករណ៍នេសាទទំនើបប្រភេទប្រើស១០០ ដែលកំពុងមានវត្តមានដាក់ស្ទាក់ចាប់យកត្រីគ្រប់ប្រភេទដោយមិនរើសមុខនៅគ្រប់រដូវ ។ករណីនេះ វាគឺជាការបំផ្លាញខ្លួនឯងតែម្តង ៕