ភ្នំពេញៈ បុរសជាជនអនាថាម្នាក់ ត្រូវបានប្រជាពលរដ្ឋប្រទះឃើញអង្គុយស្លាប់ នៅតាមចិញ្ចើមផ្លូវ ប្លែកពីសាកសពផ្សេងៗដែលជួបប្រទះកន្លងមក បង្កឲ្យភ្ញាក់ផ្អើល កាលពីវេលាម៉ោង២និង៥០នាទីរសៀល ថ្ងៃទី១៨ ខែតុលា ឆ្នាំ២០១៦ ស្ថិតនៅច្រកចូលផ្ទះប្រជាពលរដ្ឋ ជាប់ហាងលក់ស៊ុបយីហោកូនភ្លោះ ផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។

ប្រភពពីពលរដ្ឋនៅកន្លែងកើតហេតុបានឲ្យដឹងថា សាកសពមិនស្គាល់អត្តសញ្ញាណ ភេទប្រុសអាយុជាង៥០ឆ្នាំ ជាជនអនាថា តាមដៃសងខាង និងស្មា មានចាក់សាក់។ កាលពីវេលាម៉ោង១០និង៣០នាទីព្រឹក គេប្រទះឃើញ បុរសរូបនេះដើរតាមបណ្តោយផ្លូវវេងស្រេង ពីកើតមកលិចខាងទឹកដីខណ្ឌមានជ័យ ចូលមកខណ្ឌពោធិ៍សែនជ័យ ដោយដើរបណ្តើរ និយាយបណ្តើរ ច្រៀងបណ្តើរ រហូតមកដល់ចំណុចកើតហេតុខាងលើនេះ បានចូលទៅអង្គុយលើស្មៅ ច្រកចូលផ្ទះប្រជាពលរដ្ឋ ជាប់ហាងស៊ុបកូនភ្លោះ ឃើញនិយាយផង បញ្ចេញកាយវិការផង តែពុំមានអ្នកណារវល់ ឬចាប់អារម្មណ៍ឡើយ លុះរហូតដល់ពេលរសៀលថ្ងៃដដែលនេះ ស្រាប់តែ ប្រទះឃើញអង្គុយស្លាប់ទៅវិញ ទើបប្រជាពលរដ្ឋរាយការណ៍ទៅសមត្ថកិច្ច ឲ្យចុះមកពិនិត្យមើលជាក់ស្តែង។

ប្រជាពលរដ្ឋ បានឲ្យដឹងថា ថ្ងៃទី១៨ ខែតុលានេះ ក្នុងខណ្ឌពោធិ៍សែនជ័យ កើតមានករណីស្លាប់ដោយខ្លួនឯង ចំនួន៣ករណីផ្សេងគ្នា ក្នុងនោះស្លាប់ចំនួន៣នាក់ ប្រុស២នាក់ ស្រី១ម្នាក់ ក្នុងថ្ងៃតែមួយ ហើយលើកទី៣នេះជាជនអនាថា អង្គុយស្លាប់ ក្នុងភូមិត្រពាំងថ្លឹង សង្កាត់ចោមចៅ រីឯ២នាក់ ខ្យល់គ ស្លាប់នៅភូមិទួលពង្រ សង្កាត់ចោមចៅ ។

ក្រោយពីសមត្ថកិច្ចជំនាញ ធ្វើការពិនិត្យនិងធ្វើកោសល្យវិច័យរួចមក សន្និដ្ឋានថាជាការស្លាប់ដោយសារគាំងបេះដូង ហើយក៏សហការជាមួយអាជ្ញាធរដើម្បីដឹកសាកសពយកទៅវត្តធ្វើបុណ្យទៅតាមប្រពៃណី និងបន្តស្រាវជ្រាវរកសាច់ញាតិ៕