ភ្នំពេញៈ យោងតាមសេចក្តីប្រកាសរបស់ក្រសួងការបរទេស និងសហប្រតិបត្តិការកម្ពុជា បានប្រកាសថា ពលករកម្ពុជា៤រូបនឹងធ្វើមាតុភូមិនិវត្តន៍មកកម្ពុជាវិញ នៅល្ងាចថ្ងៃទី១៩ និងថ្ងៃទី២០ បន្ទាប់ពីស្ថានឯកអគ្គរដ្ឋទូតកម្ពុជាប្រចាំប្រទេសឥណ្ឌូនេស៊ី និងប្រទេសម៉ាឡេស៊ីជួយអន្តរាគមន៍។ យោងតាមប្រកាសរបស់ក្រសួងការបទេសបង្ហាញថា៖

១- ស្ថានឯកអគ្គរាជទូតកម្ពុជាប្រចាំប្រទេសឥណ្ឌូនេស៊ី បានសហការជាមួយអង្គការអន្តរជាតិ ទេសសន្តរប្រវេសន៍(IOM)នៅទីក្រុងហ្សាការតា រៀបចំមាតុភូមិនិវត្តន៍របស់ពលករខ្មែរ៣នាក់ ដែលត្រូវ​បាន​អាជ្ញាធរឥណ្ឌូនេស៊ីនៅខេត្តMedan ឃាត់ខ្លួន កាលពីថ្ងៃទី១២ ខែ កក្កដា ឆ្នាំ២០១៦ ក្នុងពេលឃាត់​ទូក​នេសាទបរទេសមួយគ្រឿងដែលបានចូលនេសាទក្នុងដែនទឹកឥណ្ឌូនេស៊ី។
ពលករខ្មែរទាំង៣នាក់ ដែលមកពីខេត្តព្រៃវែង ទី១ មានឈ្មោះម.ស.ម ទី២ ឈ្មោះ ផ.ភ និងទី៣ ឈ្មោះ អ.ច បានជាប់ឃុំនៅការិយាល័យអន្តោប្រវេសន៍ ប្រចាំកំពង់ផែ ​Belawan ក្នុង​ខេត្ត ​Medan​។ ក្រោយ ពីមានការស៊ើបអង្កេតរួចមក អាជ្ញាធរឥណ្ឌូនេស៊ី បានទទួលស្គាល់ថា ពួកគេជាជន​រង​គ្រោះ​​ដោយ​ការ​រត់ ពន្ធមនុស្ស ហើយ​បាន​​ដោះលែង តាមសំណើ​របស់​ស្ថានទូតកម្ពុជា។
ពលករខ្មែររងគ្រោះទាំង៣នាក់​ខាងលើ នឹងមកដល់ព្រលានយន្តហោះអន្តរជាតិភ្នំពេញ នៅ​ថ្ងៃ​ទី ១៩ ខែ តុលា ឆ្នាំ ២០១៦ វេលាម៉ោង១៧​:១០នាទី តាមជើងយន្តហោះលេខ MH762 ។

២- ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី កំពុងរៀបចំមាតុភូមិនិវត្តន៍របស់ពលករខ្មែរ ឈ្មោះ រ.ល.ម អាយុ៣៧ឆ្នាំ មានស្រុកកំណើតនៅខេត្តតាកែវ ដែលបានទៅប្រទេសម៉ាឡេស៊ី កាល​ពី​ខែធ្នូ ឆ្នាំ២០១៥ និងធ្វើការស្របច្បាប់នៅរោងចក្រផលិតស្រោមដៃ។ ដោយធ្វើការលំបាកពេក ពលករបាន ស្នើសុំ​​ឲ្យស្ថានទូតជួយឲ្យបានត្រឡប់មកកម្ពុជាវិញ។ ក្រោមកិច្ចអន្តរាគមន៍របស់ស្ថានទូត ថៅកែ​បាន​យល់​ព្រមប្រគល់លិខិតឆ្លងដែនឲ្យពលករវិញ។
ពលករ រ.ល.ម នឹងមកដល់ព្រលានយន្តហោះអន្តរជាតិភ្នំពេញ នៅ​ថ្ងៃ​ទី ២០ ខែ តុលា ឆ្នាំ ២០១៦ វេលាម៉ោង១៧​:១០នាទី តាមជើងយន្តហោះលេខ MH762៕