កំពង់ឆ្នាំងៈ ករណីកុមារាជិះកង់ធ្លាក់ពីលើស្ពានចូលក្នុងទឹកអូរកំពុងហូរ បណ្តាលឲ្យលង់ស្លាប់ ២នាក់ ក្នុងចំណោម៣នាក់ ភ្លាមៗរកឃើញសពកុមារាម្នាក់ បាត់ខ្លួនម្នាក់ នៅម៉ោង ១១និង៣០នាទីព្រឹក ថ្ងៃទី២០ ខែតុលា ឆ្នាំ២០១៦ ក្រុមគ្រួសារបានធ្វើពិធី បែរបន់ថ្វាយភ្លេងពិណពាទ្យដល់ម្ចាស់ទឹកម្ចាស់ដីក្នុងស្រុក ទើបអ្នកស្រុករាវរកសពឃើញ។
លោក ទឹម ចន្ធី អធិការនគរបាលស្រុករលាប្អៀរ បានឲ្យដឹងថា កុមារា ឈ្មោះ ជា ផានិត អាយុ៩ឆ្នាំ ត្រូវបានអ្នកស្រុកក្នុងភូមិនាំគ្នាមុជរាវរកឃើញ នៅម៉ោង១១និង៣០នាទី ព្រឹកថ្ងៃទី២០ ខែតុលា ឆ្នាំ២០១៦ មានរយៈពេល២៧ម៉ោង ក្រោយពីកុមាររងគ្រោះបានលង់ទឹក ហើយបន្ទាប់ពីឪពុកម្តាយ និងក្រុមគ្រួសារ បានបន់ស្រន់ថ្វាយភ្លេងពិណពាទ្យ ដល់ម្ចាស់ទឹកម្ចាស់ដី បារមីអ្នកថែរក្សានៅទីនោះ ដើម្បីឲ្យរកសពក្មេងប្រុសនោះឃើញ ហើយក៏បានប្រទះឃើញសពនោះមែន។ ចំណែកសពនៅមានសភាពរឹងធម្មតាមិនហើមនោះទេ។
លោកអធិការ បានបញ្ជាក់ថា នៅម៉ោង៨និង៣០នាទីព្រឹក ថ្ងៃទី១៩ ខែតុលា ឆ្នាំ២០១៦ កុមារាជាសិស្សសាលា ទាំង៣នាក់ បានជិះកង់មួយគ្រឿង មកដល់ចំណុចស្ពានស្វាយអាត់ ដែលមានទឹកកំពុងហូរខ្លាំង ក៏ស្រាប់តែបានដួលកង់ធ្លាក់ពីលើស្ពានចូលទឹកអូរគួច យកកុមារាទាំង៣នាក់តែម្តង សំណាងល្អកុមារាប្រុសម្នាក់ឈ្មោះ រុន វីរៈ អាយុ៩ឆ្នាំ បានស្រវាតោងមែកឈើជាប់ហើយប្រឹងវាឡើងគោក រត់ទៅប្រាប់ក្រុមគ្រួសារ ទើបអ្នកស្រុកមានការភ្ញាក់ផ្អើលនាំគ្នាចុះរាវរក។ ចំណែកក្មេងប្រុស២នាក់ ទៀតបានលង់ទឹកបាត់ខ្លួនរហូតដល់ម៉ោង ១និង១០នាទី ទើបរាវរកឃើញសពកុមារាម្នាក់ឈ្មោះ យន្ត ណារ៉ុង អាយុ១០ឆ្នាំ ដែលមានចម្ងាយប្រមាណ២៥០ម៉ែត្រពីស្ពានកន្លែងកើតហេតុ។
លោកអធិការបានបន្តថា នៅថ្ងៃទី១៩ ខែតុលា ក្រុមអ្នករាវរកបន្តរក រហូតដល់ម៉ោង៦ល្ងាច ទើបឈប់ និងព្រឹកឡើង ថ្ងៃទី២០ ខែតុលា អ្នកស្រុកបានបន្តរករហូត ដល់ម៉ោង១១និង៣០នាទី ថ្ងៃត្រង់ ទើបរកឃើញសពកុមារឈ្មោះ ជា ផានិត និងបានប្រគល់សពទៅក្រុមគ្រួសារធ្វើបុណ្យតាមប្រពៃណី។ ក្រោយពី បានរកឃើញសពក្មេងប្រុសចុងក្រោយនេះក្រុមគ្រួសារ ក៏បានធ្វើពិធីថ្វាយភ្លេងពិណពាទ្យ លាមាត់លា-ក ដល់ម្ចាស់ទឹកដីក្នុងភូមិផងដែរ ដើម្បីកុំឲ្យមានរឿងបែបនេះក្នុងភូមិនៅថ្ងៃក្រោយទៀត៕
មតិយោបល់