ភ្នំពេញ: កាលពីយប់ថ្ងៃសុក្រ ទី២១ តុលា តារាល្បីៗយ៉ាងច្រើនកុះករត្រូវគេឃើញបង្ហាញខ្លួនក្នុងពិធីបិទរឿងប៉ុស្ដិ៍លេខ៥ ដែលបានថតចប់ក្រោមចំណងជើងថា«ហង្សបាក់ស្លាប» នៅភោជនីយដ្ឋានទន្លេបាសាក់ទី២ម្ដុំក្បាលថ្នល់។ សិល្បករ និងសិល្បការនីក្មេងចាស់ និងល្បីៗឈ្មោះជាច្រើនត្រូវគេឃើញលេចមុខរាំច្រៀង និងសើចសប្បាយក្នុងពិធីនោះ។

ផលិតករប៉ុស្ដិ៍លេខ៥ បានអះអាងថា សម្រាប់ក្រុមការងារផលិតរឿងភាគក្រោមការដឹកនាំរបស់ផលិតករថៃនៅក្នុងស្ថាប័នរបស់ខ្លួន គឺឲ្យតែថតបញ្ចប់ខ្សែរឿងម្ដងៗ រមែងជួបជុំតារាសិល្ប: និងក្រុមការងារជប់លៀងជុំគ្នា ដើម្បីបង្កើនភាពស្និទ្ធស្នាល។ លោកថានេះមិនមែនជាលើកទី១នោះទេ សម្រាប់ផលិតករខាងផ្នែកផលិតរឿងនៅប៉ុស្ដិ៍លេខ ដោយសារតែពេលកន្លងទៅក៏មានពិធីជប់លៀងបញ្ចប់រឿងបែបនេះផងដែរ។ អ៊ីចឹងហើយទើបផលិតករប្រចាំនៅប៉ុស្ដិ៍លេខ៥ដដែលនេះ បានអះអាងថា ពិធីជប់លៀងអបអរខ្សែរឿង «ហង្សបាកស្លាប» ក្រោយពេលថតចប់កាលពីយប់ថ្ងៃទី២១ តុលា គឺជាទម្លាប់ធម្មតារបស់ផលិតករថៃ។

ផលិតករថៃមួយរូបបានអះអាងថា ខ្សែវីដេអូភាគរឿង «ហង្សបាក់ស្លាប» ត្រូវបានចំណាយពេលអស់ច្រើនខែ ជាមួយនឹងគុណភាពយ៉ាងល្អឥតខ្ចោះក្រោមការសម្រិតសម្រាំងរបស់ផលិតករថៃ ដោយសកម្មភាពថតបញ្ចប់ទើបតែបានកើតឡើងថ្មីៗប៉ុណ្ណោះ។ លោកថារឿងនេះចំណាយទុនច្រើនព្រោះមានតួសម្ដែងច្រើន ហើយចំពោះស្ដង់ដារផលិតក៏មិនអន់ជាងរឿងប្រទេសជិតខាងនោះដែរ។ រឿងនេះនឹងគ្រោងដាក់ផ្សាយនៅលើកញ្ចក់ទូរទស្សន៍ប៉ុស្ដិ៍លេខ៥ក្នុងពេលឆាប់ៗ ដើម្បីប្រកួតប្រជែងម៉ោងមាស ដោយមានការរំពឹងខ្ពស់។

ងាកទៅកាន់តែពិធីជប់លៀងបញ្ចប់រឿង «ហង្សបាក់ស្លាប» នោះវិញ គេឃើញមានតារាសម្ដែងចាស់ថ្មីយ៉ាងច្រើនស្កេកស្កះបង្ហាញខ្លួន ជាពិសេសគឺវត្តមានតារាល្បី។ តារាទាំងនោះរួមមាន កញ្ញានី មុន្នីនាថ កញ្ញាដួង ម៉ានិច កញ្ញាទឹម រដ្ឋា លោកយិត មាសឧស្សាហ៍ កញ្ញានីតា វរវង្ស កញ្ញាទឹម វត្តី លោកឡាទីន លោកវឌ្ឍន:ពិធីករប៉ុស្ដិ៍លេខ៥ កញ្ញាយ៉ែម ស្រីពេជ្រ លោកលាង ឧត្តម និងតារាល្បីៗជាច្រើនរូបទៀត។ ក្នុងនោះផលិតករខ្មែរ និងថៃក៏ជួបជុំគ្នាដើម្បីផ្លាស់ប្ដូរបទពិសោធន៍ការងារ និងបង្ហាញភាពស្និទ្ធស្នាលគ្នាផងដែរ៕