កណ្តាលៈ បុរសជនរងគ្រោះម្នាក់ ត្រូវបានរថយន្តបុក និងកិនពីលើទាំងម៉ូតូ ទាំងជនរងគ្រោះ បណ្តាលឲ្យស្លាប់ភ្លាមៗនៅកន្លែងកើតហេតុ រួចហើយរថយន្តក៏បន្ថែមល្បឿនបើករត់បាត់ស្រមោល។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ៥ និង៥៨នាទីល្ងាច ថ្ងៃទី២២ ខែតុលា ឆ្នាំ២០១៦ នៅចំណុចផ្លូវជាតិលេខ៦១ ចន្លោះគីឡូម៉ែត្រលេខ១២-១៣ ស្ថិតក្នុងភូមិថ្នល់បត់ ឃុំកោះចិន ស្រុកពញាឮ ខេត្តកណ្ដាល ព្រំប្រទល់ ខេត្តកណ្ដាល កំពង់ចាម។

សមត្ថកិច្ចបានឲ្យដឹងថា ជនរងគ្រោះដែលស្លាប់នោះ មិនត្រូវបានគេទាន់ស្គាល់អត្តសញ្ញាណនោះទេ ហើយសមត្ថកិច្ចបានបន្ថែមថា នៅវេលាកើតហេតុខាងលើមានម៉ូតូមួយគ្រឿងម៉ាកHonda Dream C125 ពណ៌ខ្មៅ ពាក់ស្លាកលេខកំពង់ស្ពឺ 1B-5419 អ្នកបើកបរនិងអ្នករួមដំណើរ មិនទាន់ស្គាល់អត្តសញ្ញាណបើកបរក្នុងទិសដៅពីកើតទៅលិច (បាធាយ ព្រែកក្ដាម) លុះមកដល់កន្លែងកើតហេតុមានរថយន្តមិនស្គាល់ម៉ាកបើកបរស្របទិសពីក្រោយបានបុករុញ ហើយកិនទាំងម៉ូតូនិងមនុស្សស្លាប់នៅកន្លែងកើតហេតុ រីឯរថយន្ដបង្ករបើករត់គេចបាត់ ចំណែកសព និងម៉ូតូកំពុងរង់ចាំប្រគល់ជូនក្រុមកគ្រួសារយកទៅធ្វើបុណ្យតាមប្រពៃណី៕