បន្ទាយមានជ័យ: កាលពីថ្ងៃទី២៤ ខែតុលា ឆ្នាំ២០១៦ ម្សិលមិញនេះ អយ្យការនិងតុលាការខេត្តបន្ទាយមានជ័យ បានបង្គាប់ឲ្យឃាត់ខ្លួនមន្ត្រីរាជអាវុធហត្ថក្រុងប៉ោយប៉ែត ចំនួន៣នាក់ និងម្នាក់ទៀតបានប្រគល់ឲ្យអង្គភាពដាក់វិន័យ។
កម្លាំងកងរាជអាវុធហត្ថក្រុងប៉ោយប៉ែត ដែលឃាត់ខ្លួន ទី១.ឈ្មោះ តែម ប៊ូឡា ទី២.ឈ្មោះ រស់ សាហាន ដែលទាំង២នាក់ មានឋានន្តរស័ក្ដិអនុសេនីយ៍ឯក និងជាមេបញ្ជាការរង កងរាជអាវុធហត្ថក្រុងប៉ោយប៉ែត ទី៣ ឈ្មោះ សំ សូណែល និងទី៤.ឈ្មោះ ច័ន្ទ ហាវ ទាំង២នាក់នេះ ជាមន្ត្រីកងរាជអាវុធហត្ថក្រុងប៉ោយប៉ែត។
ការឃាត់ខ្លួន និងបញ្ជូនទៅឃុំជាបណ្តោះអាសន្នមន្ត្រីរាជអាវុធហត្ថខាងលើ គឺមកពីជាប់ពាក់ព័ន្ធរឿងអាស្រូវពុករលួយយកលុយរបស់ជនរងគ្រោះ ហើយទម្លាក់កំហុសលើជនសង្ស័យជាចោរថា ជាអ្នកយកទៅចាយឬ លាក់ឯណាបាត់អស់ កាលពីយប់ថ្ងៃទី១៣ ខែតុលា ឆ្នាំ២០១៦ កន្លងមក។
រឿងរ៉ាវនោះ គឺជនរងគ្រោះឈ្មោះ តាន់ សុផៃ ភេទប្រុស អាយុ៤៣ឆ្នាំ រស់នៅសង្កាត់-ក្រុងប៉ោយប៉ែត បានបាត់លុយក្នុងរថយន្តចំនួន ៥៤ម៉ឺនបាតប្រាក់ថៃ (ជិត៧០លានរៀល ឬជិត២ម៉ឺនដុល្លារអាមេរិក) ដោយការធ្វេសប្រហែសភ្លេចចាក់សោរទ្វាររថយន្ត ខណ:បើក និងចតនៅក្នុង ផ្សាររោងក្លឿរ ឃុំខ្លងលឹក ស្រុកអារញ្ញា ខេត្តស្រះកែវប្រទេសថៃ។ ជនរងគ្រោះ បានមកប្តឹងកម្លាំងមូលដ្ឋានកងរាជអាវុធហត្ថក្រុងប៉ោយប៉ែត។
លោកវរសេនីយ៍ ជា ដា មេបញ្ជាការបានជួយអន្តរាគមន៍ដោយបញ្ជូនលោកអនុសេនីយ៍ឯក តែម ប៊ូឡា និងលោកអនុសេនីយ៍ឯក រស់ សាហាន ជាមេបញ្ជាការរងកងរាជអាវុធហត្ថក្រុងប៉ោយប៉ែត និងកម្លាំង២នាក់គឺ ឈ្មោះ សំ សូណែល និងឈ្មោះ ច័ន្ទ ហាវ បានចុះស្រាវជ្រាវ។ លុះល្ងាច ថ្ងៃទី១៤ ខែតុលា ឆ្នាំ២០១៦ នៅចំណុចភូមិក្បាលស្ពានសង្កាត់-ក្រុងប៉ោយប៉ែត ឈានដល់ការចាប់ខ្លួនបានជនសង្ស័យជាចោរ ជាបន្តបន្ទាប់ បានចំនួន៣នាក់ និងរឹបអូសវត្ថុតាងមានលុយតែចំនួន១៣៦.៧៥០បាត (ជាង១៣,៦ម៉ឺនបាត)។
ប្រភពបន្តថា ជនសង្ស័យ៣នាក់នោះរួមមាន ១.ឈ្មោះ រី ខន ភេទប្រុស អាយុ៣១ឆ្នាំ ២.ឈ្មោះ ឯម ចាន់ថន ភេទប្រុស អាយុ២៩ឆ្នាំ និង៣.ឈ្មោះ វឿន វ៉ាន់ ភេទប្រុស អាយុ២៤ឆ្នាំ។ ពួកគេស្នាក់នៅភូមិក្បាលស្ពានសង្កាត់-ក្រុងប៉ោយប៉ែត។ បន្ទាប់មក កងរាជអាវុធហត្ថបានប្រគល់លុយនៅសល់ និងរឹបអូស បាននោះចំនួន១៣៦.៧៥០បាត ជូនម្ចាស់ឈ្មោះ តាន់ សុផៃ កាលពីថ្ងៃទី១៧ ខែតុលា ឆ្នាំ២០១៦។ ម្ចាស់ និងជនរងគ្រោះមិនអស់ចិត្ត ព្រោះបាត់លុយខ្លួនអស់ចំនួន ៤០៣.២៦០បាត ហើយដល់ផ្ទៀងផ្ទាត់នឹងចម្លើយសារភាពពី ជនសង្ស័យ(ចោរ) ថាលុយដែលខ្លួនលួចបានច្រើនមិនមែនត្រឹមជាង១៣ម៉ឺនបាតនោះទេ។ រឿងនេះ មានតែពាក់ព័ន្ធនឹងមេបញ្ជាការរង និងមន្ត្រីកម្លាំង កងរាជអាវុធហត្ថក្រុងប៉ោយប៉ែតដែលចុះបង្ក្រាបនោះយក។
ជនរងគ្រោះបានប្តឹងមកអាវុធហត្ថខេត្ត និងអយ្យការអមសាលាដំបូងខេត្ត ក៏បង្កជាការធ្វើការស្រាវជ្រាវ ហើយតុលាការខេត្តចេញដីកាបង្គាប់ឲ្យនាំខ្លួនកម្លាំងកងរាជអាវុធហត្ថក្រុងប៉ោយប៉ែតចំនួន៣នាក់ ដូចខាងលើ។ ឯលោករស់ សាហាន ទទួលត្រឹមវិន័យអង្គភាព គឺបញ្ឈរជើងជាប់ទ្រុងអង្គភាពប៉ុណ្ណោះ ព្រោះគ្រាន់តែធ្វេសប្រហែស តែមិនបានយកលុយនឹងគេទេ។
ករណីនេះ ត្រូវបានគេព្យាយាមបិទបាំងយ៉ាងយូរតែទើបបែកធ្លាយនៅថ្ងៃទី២២ ខែតុលា។ គឺថាតុលាការបានបង្គាប់ឲ្យនាំខ្លួន និងចេញដីកា ឃុំខ្លួន បណ្តោះអាសន្នមន្ត្រីរាជអាវុធហត្ថ ៣នាក់រួមមានមេបញ្ជាការរងកងរាជអាវុធហត្ថក្រុងប៉ោយប៉ែត១នាក់ និងកម្លាំងកងរាជអាវុធហត្ថក្រុងប៉ោយប៉ែត២នាក់តាំងពីថ្ងៃទី២១ ខែតុលា ឆ្នាំ២០១៦ មកម្ល៉េះ។ មន្ត្រីសមត្ថកិច្ចក៏មិនអាចការពារគ្នាឯងបាន ហើយមានតែអនុវត្តតាមច្បាប់។
សូមរំលឹកថា កន្លងមកលោកតែម ប៉ូឡា និងកម្លាំងខ្លះធ្លាប់មានរឿងអាស្រូវពុករលួយនៅក្រុងប៉ោយប៉ែត ការបើកល្បែងស៊ីសង និងការបិទរឿងស៊ីដាច់មេជាដើម។-ល-៕
មតិយោបល់