ភ្នំពេញៈ គ្រោះថ្នាក់ចរាចរណ៍មួយបានកើតឡើង រវាងរថយន្តម៉ាកហាយឡែនឌ័រ បានបើកទៅបុកជាមួយនិងម៉ូតូ Yamaha FZ យ៉ាងពេញទំហឹង លាន់ឭដូចរន្ទះ បណ្តាលឲ្យយុវជនម្នាក់ស្លាប់ភ្លាមៗក្នុងថ្លុកឈាមនៅនឹងកន្លែង និងម្នាក់ទៀតរងរបួសធ្ងន់។ ហេតុការណ៍នេះបានកើតឡើងកាលពីវេលាម៉ោង ១និង១០នាទី រំលងអាធ្រាតឈានចូលថ្ងៃទី២៧ ខែតុលា ឆ្នាំ២០១៦ ស្ថិតនៅចំណុចផ្លូវឆ្លង រវាងផ្លូវជាតិលេខ៤ប្រសព្វជាមួយ ផ្លូវទំនប់កប់ស្រូវក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

តាមប្រភពនៅកន្លែងកើតហេតុ បានឲ្យដឹងថា គេបានឃើញម៉ូតូ Yamaha FZ មួយគ្រឿង ជិះឌុបគ្នាដោយយុវជន២នាក់ តាមផ្លូវទំនប់កប់ស្រូវ ក្នុងបំណងឆ្លងផ្លូវជាតិលេខ៤ បត់ទៅទិសខាងកើត ចំណែកឯរថយន្ត ហាយឡែនឌ័រ បើកបរក្នុងទិសដៅពីកើតទៅលិច ក្នុងល្បឿនលឿន លុះបានមកដល់ចំណុចកើតហេតុ បានបុកជាមួយ ម៉ូតូFZចំពីមុខយ៉ាងពេញទំហឹងលាន់ឭដូចរន្ទះ បណ្តាលឲ្យអ្នកជិះម៉ូតូម្នាក់ ស្លាប់ភ្លាមៗនៅនឹងកន្លែង ចំណែកម្នាក់ទៀតរងរបួសជាទម្ងន់ រីឯម៉ូតូFZត្រូវរថយន្ត បុកខ្ទាតជាង២០ម៉ែត្ររងការខូចខាត ដោយឡែកសម្រាប់រថយន្ត បានជ្រុលហួស ទៅមុខប្រហែល ជិត៥០ម៉ែត្រ ទើបអស់ល្បឿនទៅមុខលែងរួច ចំណែកអ្នកបើករថយន្ត ត្រូវបានប្រជាពលរដ្ឋចាប់ខ្លួនបានបម្រុងនឹងវាយស្វាគមន៍ទៅហើយ សំណាងល្អត្រូវបានសមត្ថកិច្ច ជួយរំដោះយកមក ប៉ុស្តិ៍ចោមចៅទាន់ កុំអីអាចនឹងត្រូវ រងរបួសព្រោះតែកំហឹងប្រជាពលរដ្ឋ។

ក្រោយពេលកើតហេតុ សមត្ថកិច្ចនគរបាលចរាចរណ៍ជំនាញ បានចុះមកធ្វើការវាស់វែង ដោយបានបញ្ជូនជនរងគ្រោះដែលរងរបួសធ្ងន់ទៅសង្គ្រោះបន្ទាន់នៅមន្ទីរពេទ្យ ចំណែកម៉ូតូនិងរថយន្តបង្ក ត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយគ្នាពេលក្រោយតាមផ្លូវច្បាប់ ចំណែកសាកសពជនរងគ្រោះត្រូវបានសមត្ថកិច្ចធ្វើកំណត់ហេតុ ប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕