UN: ការិយាល័យអង្គការសហប្រជាជាតិ សម្រាប់សម្របសម្រួលកិច្ចការមនុស្ស (OCHA) បានរាយការណ៍ថា មនុស្សជាង ១០.៥០០ នាក់ បានរត់ភៀសខ្លួនចេញពីទីក្រុង Mosul ក្រោយកងកម្លាំងរដ្ឋាភិបាល បើកការវាយប្រហារដណ្ដើមតំបន់មកកាន់កាប់វិញ ពីពួកសកម្មប្រយុទ្ធរដ្ឋអ៊ីស្លាម។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី២៧ ខែតុលា ឆ្នាំ២០១៦។

លោក Stephane Dujarric អ្នកនាំពាក្យរបស់ UN បានថ្លែងថា «ភាគច្រើននៃអ្នកភៀសខ្លួនទាំងនោះ ត្រូវបានផ្តល់ទីជម្រកនៅក្នុងសហគមន៍ ខណ:អ្នកផ្សេងទៀត ត្រូវបានផ្តល់ទីជម្រកនៅជំរំភៀសខ្លួនចំនួនបី នៅខាងក្រៅនៃទីក្រុង Mosul»។

យ៉ាងណាមិញលោកក៏បានបញ្ជាក់ដែរថា ផ្សែងប្រេង និងស្ពាន់ធ័រឌីអុកស៊ីតចេញពីភ្លើងឆេះព្រៃ នៅជិតតំបន់ al-Qayyarah កំពុងបន្តបង្កឲ្យមានហានិភ័យសុខភាព សម្រាប់បជនស៊ីវិលនៅក្នុងតំបន់នេះផងដែរ។

គួរបញ្ជាក់ដែរថា កងកម្លាំងសន្តិសុខអ៊ីរ៉ាក់ បានកាន់កាប់ឡើងវិញនូវភូមិជាច្រើន កាលពីថ្ងៃអង្គារ ក្រោយប្រតិបត្តិការវាយរំដោះតំបន់កាន់កាប់ ដោយពួកសកម្មប្រយុទ្ធ IS ដែលបានចាប់ផ្តើមកាលពីថ្ងៃទី ១៧ ខែតុលាកន្លងទៅ៕