ភ្នំពេញៈ ដើម្បីឲ្យរាជធានីភ្នំពេញកាន់តែមានសោភ័ណភាពទាក់ទាញភ្លៀវជាតិ អន្តរជាតិ និងម្យ៉ាងទៀតដើម្បីបម្រើការកំសាន្ត សប្បាយជូនប្រជាពលរដ្ឋនៅពេលរាត្រី រដ្ឋបាលរាជធានីភ្នំពេញ បាននិងកំពុងដំឡើងបង្គោលហ្វាខ្ពស់ៗ ប្រភេទ LED ចំនួន៥បង្គោលនៅកន្លែងកំសាន្តនានានៅក្នុងរាជធានីភ្នំពេញ ស្របពេលដែលសួនច្បារនានា កំពុងធ្វើការកែលម្អឲ្យកាន់តែប្រសើរឡើង និងការពង្រាយបង្គន់អនាម័យទំនើបៗជាច្រើនកន្លែងនោះ។

មន្ត្រីរដ្ឋបាលរាជធានីភ្នំពេញបានឲ្យដឹងថា ដើម្បីបង្កលក្ខណៈងាយស្រួលក្នុងការកំសាន្តសប្បាយជូនប្រជាពលរដ្ឋនៅពេលរាត្រី នៅថ្ងៃទី១ ខែវិច្ឆិកា ឆ្នាំ២០១៦នេះ រដ្ឋបាលរាជធានីភ្នំពេញ បាននិងកំពុងដំឡើងបង្គោលហ្វាខ្ពស់ប្រភេទ LED ចំនួន៥បង្គោលនៅតាមទីកន្លែងកំសាន្តនានានៅក្នុងរាជធានីភ្នំពេញ ក្នុងនោះរួមមាន ការដំឡើងបង្គោលហ្វាខ្ពស់ប្រភេទ LED ចំនួន៤បង្គោលនៅទីធ្លាសួនច្បារបទុមវតី និងចំនួន១បង្គោលទៀតនៅសួនច្បារអរិយក្សត្រ៕